ఐపీఎల్‌లో విరాట్ కోహ్లీ ఆదాయం ఎంతో మీకు తెలుసా ?

Virat Kohli IPL Earnings: ప్రపంచంలోనే అత్యంత ధనిక క్రికెట్ లీగ్‌గా పేరొందిన ఐపీఎల్ (IPL), కేవలం ఆటలోనే కాదు.. డబ్బుల వర్షం కురిపించడంలోనూ సరికొత్త రికార్డులను సృష్టిస్తోంది.

తాజాగా విడుదలైన ఒక అధికారిక నివేదిక ప్రకారం, ఐపీఎల్ చరిత్రలోనే అత్యధిక మొత్తం ఆర్జించిన ఆటగాడిగా టీమిండియా స్టార్ బ్యాటర్, రన్ మెషిన్ విరాట్ కోహ్లీ సరికొత్త మైలురాయిని అందుకున్నాడు. ప్రముఖ అంతర్జాతీయ రీసెర్చ్ సంస్థలు ‘ఫెనాటిక్ స్పోర్ట్స్’, ‘హురూన్ ఇండియా’ సంయుక్తంగా ప్రకటించిన “మోస్ట్ వాల్యూబుల్ స్పోర్ట్స్ టీమ్స్ 2026” నివేదికలో ఈ ఆసక్తికరమైన విషయాలు వెల్లడయ్యాయి. లీగ్ ప్రారంభమైన తొలి సీజన్ (2008) నుంచి ఇప్పటివరకు విరాట్ కోహ్లీ ఒకే ఒక్క ఫ్రాంచైజీ అయిన రాయల్ ఛాలెంజర్స్ బెంగళూరు (RCB) తరపునే ఆడుతూ ఈ అరుదైన ఆర్థిక ఘనత సాధించడం విశేషం.

ఈ నివేదిక ప్రకారం, విరాట్ కోహ్లీ ఐపీఎల్ శాలరీల ద్వారా ఇప్పటివరకు ఏకంగా రూ. 230 కోట్ల భారీ ఆదాయాన్ని గడించి చార్ట్‌లో అగ్రస్థానంలో నిలిచాడు. కోహ్లీ తర్వాత స్థానాల్లో టీమిండియా మాజీ కెప్టెన్లు రోహిత్ శర్మ, ఎంఎస్ ధోనీ నిలిచారు. ముంబై ఇండియన్స్‌కు ఐదు ట్రోఫీలు అందించిన హిట్‌మ్యాన్ రోహిత్ శర్మ మొత్తంగా రూ. 227.2 కోట్ల సంపాదనతో రెండో స్థానాన్ని దక్కించుకోగా.. చెన్నై సూపర్ కింగ్స్ లెజెండరీ ఫినిషర్ మహేంద్ర సింగ్ ధోనీ రూ. 200 కోట్ల నెట్ ఐపీఎల్ శాలరీతో మూడో స్థానంలో నిలిచారు.

Virat Kohli IPL Earnings: అత్యంత విలువైన జట్టుగా కేకేఆర్.. ముంబై, చెన్నైలను వెనక్కి నెట్టి షారుఖ్ టీమ్ నంబర్ 1!

ఆటగాళ్ల సంపాదనే కాకుండా, ఐపీఎల్‌లోని 10 ఫ్రాంచైజీల మొత్తం బ్రాండ్ విలువ కూడా ఊహించని స్థాయికి చేరింది. ప్రస్తుతం లీగ్‌లోని అన్ని జట్ల కలిపిన మొత్తం మార్కెట్ విలువ అక్షరాలా రూ. 1.63 లక్షల కోట్లు (దాదాపు 18 బిలియన్ డాలర్లు) గా ఈ నివేదిక లెక్కగట్టింది. ఇందులో అందరినీ ఆశ్చర్యపరుస్తూ బాలీవుడ్ బాద్‌షా షారుఖ్ ఖాన్‌కు చెందిన కోల్‌కతా నైట్ రైడర్స్ (KKR) అత్యంత విలువైన జట్టుగా నంబర్ 1 స్థానాన్ని కైవసం చేసుకుంది. కేకేఆర్ ప్రస్తుత మార్కెట్ బ్రాండ్ విలువ ఏకంగా రూ. 19,200 కోట్లు పైమాటే అని తేలింది. గ్లోబల్ లీగ్స్‌లో కేకేఆర్ బ్రాండ్ విస్తరించడం, భారీ అంతర్జాతీయ ఫ్యాన్ బేస్ ఉండటమే దీనికి ప్రధాన కారణం.

Virat Kohli Sets a New Record in the IPL

ఇక ఐపీఎల్‌లో అత్యంత విజయవంతమైన జట్లుగా పేరు తెచ్చుకున్న అంబానీ గ్రూప్‌కు చెందిన ముంబై ఇండియన్స్ (MI), ఎన్.శ్రీనివాసన్ నేతృత్వంలోని చెన్నై సూపర్ కింగ్స్ (CSK) చెరో రూ. 18,400 కోట్ల బ్రాండ్ విలువతో సంయుక్తంగా తర్వాతి స్థానాల్లో నిలిచాయి.

2032 నాటికి అమెరికా ‘ఎన్‌ఎఫ్ఎల్’ లీగ్‌తో ఐపీఎల్ పోటీ!

హురూన్ ఇండియా వ్యవస్థాపకుడు అనాస్ రెహమాన్ జునైద్ తెలిపిన వివరాల ప్రకారం.. భారతదేశంలో క్రీడా రంగంలోకి పెట్టుబడులు భారీగా పెరుగుతున్నాయి. ఇదే వేగవంతమైన ట్రెండ్ కొనసాగితే, వచ్చే 2032 నాటికి ఒక్కో ఐపీఎల్ జట్టు సగటు విలువ ఏకంగా 15 బిలియన్ డాలర్లకు (దాదాపు రూ. 1.25 లక్షల కోట్లు) చేరుకుంటుందని అంచనా వేశారు. అంటే భవిష్యత్తులో అమెరికాకు చెందిన ప్రసిద్ధ ఎన్‌ఎఫ్ఎల్ (NFL) జట్లతో మన ఐపీఎల్ ఫ్రాంచైజీలు మార్కెట్ విలువ పరంగా గట్టి పోటీ పడనున్నాయని నివేదిక స్పష్టం చేసింది.