ఆంధ్రప్రదేశ్ రాష్ట్రంలోని నిరుద్యోగులకు ప్రభుత్వం తీపి కబురు అందించింది. ముఖ్యంగా గ్రామీణ మరియు పట్టణ ప్రాంతాల్లోని మహిళలకు ఉపాధి కల్పించే దిశగా అంగన్వాడీ కేంద్రాల్లో ఖాళీగా ఉన్న పోస్టుల భర్తీకి గ్రీన్ సిగ్నల్ ఇచ్చింది.

రాష్ట్రవ్యాప్తంగా ఉన్న అంగన్వాడీ కేంద్రాల్లో ఖాళీగా ఉన్న సుమారు 5,000 ఆయా (హెల్పర్) పోస్టులను భర్తీ చేయాలని ప్రభుత్వం నిర్ణయించింది. ఈ మేరకు స్త్రీ, శిశు సంక్షేమ శాఖ మంత్రి గుమ్మిడి సంధ్యారాణి కీలక ప్రకటన చేశారు. ఈ నియామక ప్రక్రియకు సంబంధించి ఇప్పటికే ప్రభుత్వం నుండి అధికారిక అనుమతులు లభించాయని ఆమె స్పష్టం చేశారు. అంగన్వాడీ కేంద్రాల పనితీరును మరింత మెరుగుపరచడానికి మరియు చిన్నారులకు మెరుగైన సేవలు అందించడానికి ఈ పోస్టుల భర్తీ ఎంతో కీలకం కానుంది.

Read Also : DC vs RCB: ఢిల్లీని చిత్తు చేసిన బెంగళూరు

తొలి విడతలో 13 జిల్లాల్లో నియామకాలు

మొత్తం 5 వేల పోస్టుల భర్తీని ప్రభుత్వం రెండు విడతలుగా చేపట్టనుంది. ఇందులో భాగంగా మొదటి విడతలో 13 జిల్లాల్లోని 2,645 పోస్టులను భర్తీ చేయనున్నారు. ఇప్పటికే కొన్ని జిల్లాల్లో సంబంధిత అధికారులు నోటిఫికేషన్లు కూడా విడుదల చేశారని మంత్రి తెలిపారు. మిగిలిన జిల్లాల్లో కూడా నియామక ప్రక్రియకు సంబంధించిన ఏర్పాట్లు వేగంగా జరుగుతున్నాయని, త్వరలోనే అక్కడ కూడా నోటిఫికేషన్లు వెలువడతాయని ఆమె వివరించారు. అర్హత కలిగిన అభ్యర్థులు ఈ అవకాశాన్ని సద్వినియోగం చేసుకోవాలని ప్రభుత్వం సూచించింది.