అన్నం, చపాతీ కలిపి తింటే శరీరంలో వచ్చే అనారోగ్య సమస్యలు?

Rice and Chapati: భారతీయ ఇళ్లలో మధ్యాహ్నం లేదా రాత్రి భోజనంలో అన్నంతో పాటు చపాతీ (రొట్టె) కూడా కలిపి తినడం చాలా మందికి అలవాటు. అయితే, ఈ రెండు కలిపి తినే అలవాటే మన దేశంలో డయాబెటిస్ (మధుమేహం), ఊబకాయం, గుండె జబ్బులు వేగంగా పెరగడానికి ప్రధాన కారణమవుతోందని ఆరోగ్య నిపుణులు హెచ్చరిస్తున్నారు.

విడివిడిగా చూస్తే అన్నం కానీ, రొట్టె కానీ శరీరానికి హానికరం కాదు. కానీ, ఈ రెండింటినీ ఒకేసారి ప్లేటులోకి తెచ్చుకుని, అధిక మొత్తంలో తింటూ ఉండటమే అసలు ముప్పని వారు స్పష్టం చేస్తున్నారు.

ఒకప్పుడు ఉత్తర భారతదేశంలో రొట్టెలు, దక్షిణ భారతదేశంలో అన్నం ప్రధాన ఆహారంగా ఉండేవి. కానీ మారుతున్న జీవనశైలి, పట్టణీకరణ కారణంగా ఈ రెండు ఆహారాలు ఒకే భోజనంలో భాగమయ్యాయి. దీనివల్ల మన ప్లేటులో కార్బోహైడ్రేట్ల (పిండిపదార్థాలు) శాతం విపరీతంగా పెరిగిపోతోంది. అదే సమయంలో శరీరానికి అత్యంత అవసరమైన ప్రోటీన్లు, విటమిన్లు, పీచుపదార్థాలు (ఫైబర్) ఉన్న కూరగాయల వాటా తగ్గిపోతోంది. ఈ విధంగా మితిమీరిన కార్బోహైడ్రేట్లు శరీరంలోకి చేరడం వల్ల రక్తంలో గ్లూకోజ్ స్థాయిలు అకస్మాత్తుగా పెరుగుతాయి. ఇది ఇన్సులిన్ నిరోధకతకు (Insulin Resistance) దారితీసి, కాలక్రమేణా షుగర్ వ్యాధిగా మరియు ఊబకాయంగా మారుతుంది.

మీ భోజనం ప్లేటు ఎలా ఉండాలి? బ్యాలెన్స్‌డ్ డైట్ కోసం సులువైన చిట్కాలు!

ఆరోగ్య సమస్యల బారిన పడకుండా ఉండాలంటే ఆహారాన్ని పూర్తిగా మానేయాల్సిన అవసరం లేదని, తినే పరిమాణంలో మార్పులు చేసుకుంటే సరిపోతుందని న్యూట్రిషనిస్టులు చెబుతున్నారు. భోజనాన్ని సమతులంగా (Balanced Diet) మార్చుకోవడానికి వారు ఇస్తున్న సూత్రాలు ఇవే:

సగం ప్లేటు (50%): మీ భోజనం ప్లేటులో సగం భాగం వండిన ఆకుకూరలు, కూరగాయలు మరియు పచ్చి సలాడ్లతో నిండి ఉండాలి.

పావు వంతు (25%): మరో పావు భాగంలో పప్పులు, పనీర్, గుడ్లు, లేదా చికెన్ వంటి ప్రోటీన్లు ఎక్కువగా ఉండే ఆహార పదార్థాలు ఉండాలి.

మిగిలిన పావు వంతు (25%): ఈ చివరి భాగంలో మాత్రమే అన్నం లేదా రొట్టె.. ఈ రెండింటిలో ఏదో ఒక కార్బోహైడ్రేట్ ఆహారాన్ని మాత్రమే తీసుకోవాలి.

ఆహార నియమాల్లో ఇటువంటి చిన్న మార్పులు చేసుకోవడం మరియు ప్లేటును సమతులంగా మార్చుకోవడం ద్వారా డయాబెటిస్, గుండె జబ్బుల వంటి దీర్ఘకాలిక సమస్యలకు దూరంగా ఉండవచ్చని నిపుణులు స్పష్టం చేస్తున్నారు.

Read hindi news : hindi.vaartha.com