అన్నయ్య సినిమా ఓపెనింగ్ కు తమ్ముడు ముఖ్య అతిధి ?

మెగాస్టార్ చిరంజీవి తన 158వ సినిమాను దర్శకుడు బాబీతో కలిసి సెట్స్ మీదకు తీసుకెళ్లేందుకు సిద్ధమయ్యారు. ఈ సినిమా ప్రారంభోత్సవ వేడుకకు సంబంధించి సోషల్ మీడియాలో ఒక క్రేజీ అప్‌డేట్ వైరల్ అవుతోంది.

మెగాస్టార్ చిరంజీవి తన కెరీర్‌లో అత్యంత ప్రతిష్టాత్మకమైన 158వ చిత్రాన్ని దర్శకుడు బాబీ (కె.ఎస్. రవీంద్ర) దర్శకత్వంలో చేయబోతున్నారు. ఈ సినిమా గ్రాండ్ లాంచ్ వేడుక ఏప్రిల్ 11న నిర్వహించేందుకు ముహూర్తం ఖరారైనట్లు సమాచారం. అయితే, ఈ వేడుకలో హైలైట్ ఏమిటంటే.. అన్నయ్య చిరంజీవి క్లాప్ కొట్టేందుకు తమ్ముడు, పవర్ స్టార్ పవన్ కళ్యాణ్ ముఖ్య అతిథిగా రాబోతున్నారనే వార్త మెగా అభిమానుల్లో ఉత్సాహాన్ని నింపుతోంది. ఒకవేళ ఇదే నిజమైతే, ఒకే ఫ్రేమ్‌లో మెగా బ్రదర్స్‌ను చూడటం అభిమానులకు పెద్ద పండగే అవుతుంది.

సంక్రాంతి బరిలో మెగాస్టార్

గతంలో చిరంజీవితో ‘వాల్తేరు వీరయ్య’ వంటి బ్లాక్ బస్టర్ హిట్ అందించిన దర్శకుడు బాబీ, మరోసారి మెగాస్టార్‌ను పవర్‌ఫుల్ రోల్‌లో చూపించేందుకు సిద్ధమయ్యారు. ఈ చిత్రాన్ని కె.వి.ఎన్ (KVN) ప్రొడక్షన్స్ సంస్థ నిర్మిస్తుండగా, యంగ్ సెన్సేషన్ థమన్ సంగీతం అందించే అవకాశం ఉన్నట్లు తెలుస్తోంది. ఈ సినిమాను వచ్చే ఏడాది సంక్రాంతి కానుకగా విడుదల చేసేందుకు చిత్రయూనిట్ సన్నాహాలు చేస్తోంది. మళ్ళీ బాబీ దర్శకత్వంలో మెగాస్టార్ ఎలాంటి విజువల్స్ ప్లాన్ చేస్తున్నారోనని టాలీవుడ్ మొత్తం ఆసక్తిగా ఎదురుచూస్తోంది.

మెగా ఫ్యాన్స్‌లో జోష్

పవన్ కళ్యాణ్ హాజరవుతారనే వార్త వినగానే మెగా ఫ్యాన్స్ సోషల్ మీడియాలో రచ్చ చేస్తున్నారు. అయితే దీనిపై చిత్ర యూనిట్ నుండి అధికారిక ప్రకటన రావాల్సి ఉంది. ప్రస్తుతం పవన్ కళ్యాణ్ తన రాజకీయ కార్యకలాపాలతో పాటు తన సొంత సినిమాల్లో బిజీగా ఉన్నప్పటికీ, అన్నయ్య సినిమా కావడంతో కచ్చితంగా వస్తారని ఇండస్ట్రీ వర్గాలు భావిస్తున్నాయి. ‘చిరు 158’ ప్రాజెక్ట్ అనౌన్స్ అయినప్పటి నుండే భారీ అంచనాలు నెలకొనగా, ఇప్పుడు పవన్ ఎంట్రీతో ఆ అంచనాలు మరో స్థాయికి చేరుకున్నాయి.