America : అంతరిక్ష యుద్ధ భయాలను నిజం చేస్తూ అమెరికా అత్యంత సంచలనాత్మక విషయాన్ని బహిర్గతం చేసింది. భూమి చుట్టూ తిరిగే కక్ష్యలో (Orbit) తమ ఆయుధాలను మోహరించినట్లు అగ్రరాజ్యం తొలిసారిగా అధికారికంగా అంగీకరించింది.
అమెరికాతో పాటు దాని మిత్రదేశాల ఉపగ్రహాలు, అంతరిక్ష ఆస్తులను శత్రువుల నుండి సంరక్షించుకోవడానికే ఈ ‘స్పేస్ కంట్రోల్ వెపన్స్’ను రూపకల్పన చేసి కక్ష్యలోకి పంపినట్లు యుఎస్ ఎయిర్‌ఫోర్స్ సెక్రటరీ ట్రోయ్ ధృవీకరించారు. నింగిలో తమ సార్వభౌమాధికారాన్ని, భద్రతను కాపాడుకోవడానికి ఈ ఆయుధాలు నిరంతరం నిఘా ఉంచుతాయని ఆయన స్పష్టం చేశారు. అయితే, కక్ష్యలో మోహరించినవి ఎలాంటి సాంకేతికత కలిగిన ఆయుధాలనే సమాచారాన్ని మాత్రం అమెరికా అత్యంత రహస్యంగా ఉంచింది.
రష్యా, చైనాల ముప్పుపై ముందస్తు వ్యూహం: విశ్లేషకుల అంచనా
అంతరిక్షంలో రష్యా, చైనాల వైఖరిని అమెరికా ప్రధాన ముప్పుగా భావిస్తుండటమే ఈ సంచలన నిర్ణయానికి ప్రధాన కారణమని అంతర్జాతీయ రక్షణ రంగ విశ్లేషకులు అభిప్రాయపడుతున్నారు. ఇటీవల చైనా తన శాటిలైట్ విధ్వంసక సాంకేతికతను (Anti-satellite weapons), రష్యా తన స్పేస్ మస్క్యులేచర్‌ను వేగంగా విస్తరిస్తుండటంతో అగ్రరాజ్యం అప్రమత్తమైంది. శాటిలైట్ కమ్యూనికేషన్స్, జిపిఎస్, మిలట్రీ నిఘా వ్యవస్థలను దెబ్బతీసేందుకు శత్రు దేశాలు ప్రయత్నిస్తే, వాటిని అంతరిక్షంలోనే అడ్డుకునేలా ఈ స్పేస్ ఆయుధాలు పనిచేయనున్నాయి. అమెరికా తీసుకున్న ఈ నిర్ణయం వల్ల భవిష్యత్తులో భూమిపైనే కాకుండా అంతరిక్షంలోనూ ఆధిపత్యం కోసం తీవ్రమైన పోటీ మరియు ‘స్పేస్ వార్’ వాతావరణం నెలకొనే అవకాశాలు స్పష్టంగా కనిపిస్తున్నాయి.