వెండితెరపై వందలాది చిత్రాల్లో వైవిధ్యమైన నటనతో, తనదైన హాస్యంతో ప్రేక్షకులను నవ్వించిన సీనియర్ క్యారెక్టర్ ఆర్టిస్ట్ పావలా శ్యామల జీవితం అత్యంత దయనీయ స్థితికి చేరుకుంది.

తీవ్రమైన గుండె జబ్బుతో బాధపడుతున్న ఆమె చికిత్స నిమిత్తం హైదరాబాద్ కూకట్‌పల్లిలోని ఒక ప్రముఖ ప్రైవేట్ ఆసుపత్రికి వెళ్లగా, అక్కడ మానవత్వం మంటగలిసేలా ప్రవర్తించారు. చికిత్సకు అవసరమైన నగదు ఆమె వద్ద లేదనే ఒకే ఒక్క కారణంతో ఆసుపత్రి యాజమాన్యం ఆమెను చేర్చుకోవడానికి నిరాకరించడమే కాకుండా, కనీస మానవత్వం లేకుండా ఒక క్యాబ్ (Cab) బుక్ చేసి అక్కడి నుంచి పంపించివేసింది. ఈ ఘటన టాలీవుడ్ ఇండస్ట్రీతో పాటు సాధారణ సమాజంలోనూ తీవ్ర దిగ్భ్రాంతిని, ఆగ్రహాన్ని కలిగిస్తోంది.

Read Also : పెద్ది నుంచి 'రాంబుజ్జి' ఎంట్రీ.. మరో గ్లింప్స్ వీడియో విడుదల

అర్ధరాత్రి వైజంక్షన్ ఫుట్పాత్ పై దీనస్థితి.. రక్షించిన స్థానికులు, పోలీసులు

ఆసుపత్రి యాజమాన్యం పంపిన క్యాబ్ డ్రైవర్ మరింత అమానుషంగా ప్రవర్తించాడు. అర్ధరాత్రి వేళ శ్యామల దయనీయ స్థితిని చూసైనా జాలి పడకుండా, ఆమెను కూకట్‌పల్లి వైజంక్షన్ (Y-Junction) వద్ద రోడ్డుపై వదిలేసి వెళ్ళిపోయాడు. వయసు పైబడిన వృద్ధురాలు, దానికి తోడు తీవ్ర అనారోగ్యంతో ఉన్న ఆమె అర్ధరాత్రి చీకట్లో ఫుట్‌పాత్‌పై ఒంటరిగా, బిక్కుబిక్కుమంటూ కూర్చుని సహాయం కోసం చూసింది. ఆ సమయంలో అటుగా వెళ్తున్న కొందరు స్థానికులు ఆమెను గుర్తుపట్టి, తక్షణమే పోలీసులకు సమాచారం అందించారు. రంగంలోకి దిగిన పోలీసులు ఆమెకు ప్రాథమిక రక్షణ కల్పించి, సురక్షిత ప్రాంతానికి తరలించేలా చర్యలు చేపట్టారు.

ఆర్కే ఫౌండేషన్ ఆశ్రయం.. సినీ పెద్దల మౌనంపై విమర్శలు

పోలీసులు మరియు కొందరు దాతలు కలిసి పావలా శ్యామలను తక్షణమే అనాథలకు, వృద్ధులకు ఆశ్రయం కల్పించే ప్రముఖ స్వచ్ఛంద సంస్థ ‘ఆర్కే ఫౌండేషన్’ (RK Foundation) కు తరలించారు. ప్రస్తుతం ఫౌండేషన్ నిర్వాహకులు ఆమెకు వసతితో పాటు అత్యవసర వైద్య సేవలను అందిస్తున్నారు. గతంలో మెగాస్టార్ చిరజీవి, పవన్ కల్యాణ్ వంటి కొందరు సినీ ప్రముఖులు ఆమెకు ఆర్థిక సహాయం అందించినప్పటికీ, శాశ్వత జీవనాధారం లేకపోవడంతో ఆమె పరిస్థితి మళ్లీ మొదటికి వచ్చింది. వందల కోట్ల టర్నోవర్ ఉన్న టాలీవుడ్ చిత్ర పరిశ్రమలో, ‘మా’ (MAA) అసోసియేషన్ లాంటి పెద్ద సంస్థలు ఉన్నప్పటికీ, ఒక సీనియర్ నటి ఇలా నడిరోడ్డుపై దీనస్థితిలో పడి ఉండటం పరిశ్రమలోని లోపాలను, తోటి కళాకారుల పట్ల ఉన్న నిర్లక్ష్యాన్ని ఎత్తిచూపుతోందని నెటిజన్లు సోషల్ మీడియా వేదికగా మండిపడుతున్నారు.