బండరాయి కింద నలిగిన కూలీ ప్రాణాలు

Rock Collapses Quarry In Bengaluru : కర్ణాటకలోని బెంగళూరు పరిసర ప్రాంతంలో గురువారం తెల్లవారుజామున ఒక ఘోర ప్రమాదం సంభవించింది. మాద పట్టణ సమీపంలోని ఒక రాతి క్వారీలో భారీ బండరాయి ఒక్కసారిగా కిందకు దొర్లిపడటంతో బిహార్‌కు చెందిన 8 మంది వలస కూలీలు అక్కడికక్కడే ప్రాణాలు కోల్పోయారు.

ఈ దుర్ఘటనలో మరికొంత మంది తీవ్రంగా గాయపడ్డారు. పోలీసులు తెలిపిన వివరాల ప్రకారం.. బెంగళూరు దక్షిణ తాలూకాలోని మాదపట్టణలో ఉన్న ఓ స్టోన్ క్రషర్ సైట్‌లో ఈ విషాదం చోటుచేసుకుంది. రోజువారీ కూలీలుగా పనిచేస్తున్న కార్మికులు క్వారీలో ఎప్పటిలాగే పనులు చేస్తుండగా, సుమారు 40 అడుగుల ఎత్తు నుంచి ఒక్కసారిగా ఓ భారీ బండరాయి వారిపైకి కుప్పకూలింది. ప్రమాద సమయంలో అక్కడ మొత్తం 18 మందికి పైగా కార్మికులు ఉన్నట్లు ప్రత్యక్షసాక్షులు తెలిపారు.

Rock Collapses Quarry In Bengaluru

బండరాయి కింద నలిగిపోయి 8 మంది అక్కడికక్కడే మరణించగా, గాయపడిన ఐదుగురిని చికిత్స కోసం రాజరాజేశ్వరి ఆసుపత్రికి తరలించారు. శిథిలాల కింద ఇంకా ఎవరైనా చిక్కుకున్నారా అనే కోణంలో విపత్తు నిర్వహణ సిబ్బంది గాలింపు చర్యలు ముమ్మరం చేశారు. ఈ ఘోర ప్రమాదంపై కర్ణాటక ముఖ్యమంత్రి డీ.కే. శివకుమార్ ఎక్స్ (ట్విట్టర్) వేదికగా తీవ్ర విచారం వ్యక్తం చేశారు. మరణించిన వారి ఆత్మలకు శాంతి చేకూరాలని, గాయపడిన వారు త్వరగా కోలుకోవాలని ప్రార్థించారు. కార్మికుల ప్రాణ రక్షణ, భద్రతను కల్పించడం క్వారీ యజమానుల బాధ్యత అని గుర్తు చేస్తూ, నిబంధనలను ఉల్లంఘించే క్వారీలపై ప్రభుత్వం కఠిన చర్యలు తీసుకుంటుందని ఆయన స్పష్టం చేశారు.

Rock Collapses Quarry In Bengaluru : అధికారుల అండతోనే అక్రమ క్వారీలు: ఎమ్మెల్యే సోమశేఖర్ ఆరోపణ

మరోవైపు ఈ దుర్ఘటనపై యశ్వంత్‌పుర్ ఎమ్మెల్యే ఎస్.టి. సోమశేఖర్ తీవ్ర ఆరోపణలు చేశారు. గత కొన్నేళ్లుగా ఈ ప్రాంతంలో జరుగుతున్న అక్రమ క్వారీ నిర్వహణపై తాను కర్ణాటక అసెంబ్లీలోనూ సమస్యను లేవనెత్తానని చెప్పారు. కొంతకాలం క్రితం ఇక్కడ జరిపిన పేలుళ్ల కారణంగా ఒక చిరుతపులి కూడా చనిపోయిందని ఆయన గుర్తు చేశారు. ఈ అక్రమాల్లో పోలీసులు, అటవీ శాఖ, గనుల శాఖ అధికారులు కూడా ప్రమేయం కలిగి ఉన్నారని, వారిపై తక్షణమే కేసులు నమోదు చేసి విచారించాలని ఆయన డిమాండ్ చేశారు. ప్రస్తుతం పోలీసులు నిర్వాహకుల నిర్లక్ష్యంపై కేసు నమోదు చేసి దర్యాప్తు ప్రారంభించారు.