బంగారం కొనొద్దంటూ మోడీ వ్యాఖ్యల వెనుక అసలు ఉద్దేశ్యం ఏంటి ?

బంగారం ధరలు ఆకాశాన్ని తాకుతున్న ప్రస్తుత తరుణంలో, ఏడాది పాటు ఎటువంటి ఫంక్షన్లు ఉన్నా బంగారం కొనవద్దని ప్రధాని పిలుపునిచ్చారు. దీని వెనుక ప్రధాన ఉద్దేశ్యం దేశ వాణిజ్య లోటును (Trade Deficit) తగ్గించడం.

భారత్ తన అవసరాలకు సరిపడా బంగారాన్ని విదేశాల నుండి దిగుమతి చేసుకుంటుంది, దీనికోసం భారీగా విదేశీ మారక ద్రవ్యం (డాలర్లు) వెచ్చించాల్సి వస్తుంది. ప్రజలు బంగారం కొనుగోళ్లు తగ్గించడం ద్వారా రూపాయి విలువ స్థిరంగా ఉండటమే కాకుండా, ఆ సొమ్మును ఇతర ఉత్పాదక రంగాల్లో పెట్టుబడిగా పెట్టవచ్చని ప్రభుత్వం భావిస్తోంది. ఇది కేవలం వ్యక్తిగత పొదుపు మాత్రమే కాదు, దేశ ఆర్థిక భద్రతకు సంబంధించిన విషయం.

వ్యవసాయం మరియు వనరుల పొదుపు

బంగారంతో పాటు రాగి కొరత, ఎరువుల వినియోగంపై కూడా మోదీ స్పందించారు. రైతులు రసాయన ఎరువులు, పురుగుమందుల వాడకాన్ని తగ్గించి సేంద్రీయ వ్యవసాయం (Organic Farming) వైపు మళ్లాలని సూచించారు. అధిక రసాయనాల వాడకం వల్ల భూసారం దెబ్బతినడమే కాకుండా, ఎరువుల సబ్సిడీ రూపంలో ప్రభుత్వంపై భారీ భారం పడుతోంది. అలాగే వంట నూనె దిగుమతులపై మనం ఇతర దేశాలపై ఆధారపడుతున్నాం కాబట్టి, దాని వినియోగాన్ని తగ్గించుకోవడం వల్ల ఆరోగ్యం మెరుగుపడటంతో పాటు విదేశీ మారక ద్రవ్యం ఆదా అవుతుందని ఆయన వివరించారు.

మధ్యతరగతికి పొదుపు మంత్రం – ఆడంబరాలకు స్వస్తి

మధ్యతరగతి ప్రజలు దుబారా ఖర్చులను తగ్గించుకోవాలని, ఆడంబరాల కోసం అప్పులు చేయవద్దని మోదీ హితవు పలికారు. ప్రస్తుత ప్రపంచ ఆర్థిక పరిస్థితులు అనిశ్చితంగా ఉన్న నేపథ్యంలో, పొదుపు అనేది ఒక ఆయుధంగా మారుతుందని ఆయన అభిప్రాయపడ్డారు. వివాహాలు, ఇతర వేడుకల్లో అనవసర ప్రదర్శనలు తగ్గించుకోవడం ద్వారా ఆర్థిక సుస్థిరత లభిస్తుంది. “తక్కువ వనరులతో ఎక్కువ ప్రయోజనం” అనే సూత్రాన్ని పాటిస్తూ, సామాన్య ప్రజలు దేశాభివృద్ధిలో భాగస్వాములు కావాలని ప్రధాని ఈ సందర్భంగా ఆకాంక్షించారు.