పశ్చిమ బెంగాల్ రాజకీయాల్లో మరోసారి ఉత్కంఠ రేపుతున్న ఎన్నికల ఫలితాల వేళ, ముఖ్యమంత్రి మమతా బెనర్జీ చేసిన వ్యాఖ్యలు రాజకీయ వర్గాల్లో చర్చనీయాంశంగా మారాయి.

పశ్చిమ బెంగాల్ అసెంబ్లీ ఎన్నికల ఫలితాల పట్ల తృణమూల్ కాంగ్రెస్ (TMC) అధినేత్రి మమతా బెనర్జీ అత్యంత విశ్వాసంతో ఉన్నారు. రాష్ట్రంలో తమ పార్టీ ప్రభంజనం కొనసాగుతుందని, ఈసారి ఏకంగా 226కు పైగా స్థానాల్లో ఘనవిజయం సాధించి మరోసారి ప్రభుత్వాన్ని ఏర్పాటు చేస్తామని ఆమె ధీమా వ్యక్తం చేశారు. కేంద్రంలో అధికారంలో ఉన్న బీజేపీ ఎన్ని వ్యూహాలు పన్నినప్పటికీ, బెంగాల్ ప్రజలు తమ వైపే ఉన్నారని ఆమె స్పష్టం చేశారు. ముఖ్యంగా సంక్షేమ పథకాలు, స్థానిక సెంటిమెంట్ తమను మళ్ళీ అధికార పీఠంపై కూర్చోబెడతాయని దీదీ నమ్ముతున్నారు.

Read Also : సీఎం మార్పుపై మల్లికార్జున ఖర్గే కీలక ప్రకటన

ఎగ్జిట్ పోల్స్‌పై విమర్శలు.. కార్యకర్తలకు అలెర్ట్!

ఇటీవల విడుదలైన ఎగ్జిట్ పోల్ అంచనాలను మమతా బెనర్జీ పూర్తిగా కొట్టిపారేశారు. ఈ అంచనాలన్నీ బీజేపీ కనుసన్నల్లో రూపొందించినవని, తమ పార్టీ కార్యకర్తలను మానసికగా నిరుత్సాహపరచడమే వీటి ప్రధాన ఉద్దేశమని ఆమె ఆరోపించారు. మే 4వ తేదీన జరగబోయే ఓట్ల లెక్కింపు ప్రక్రియలో కార్యకర్తలు అత్యంత అప్రమత్తంగా ఉండాలని ఆమె పిలుపునిచ్చారు. కౌంటింగ్ కేంద్రాల వద్ద ఎక్కడా ఏమరుపాటుగా ఉండకూడదని, తుది ఫలితం వచ్చే వరకు పోరాడాలని సూచించారు. ఎగ్జిట్ పోల్స్ అంకెలతో సంబంధం లేకుండా క్షేత్రస్థాయిలో టీఎంసీకి బలమైన మద్దతు ఉందని ఆమె పునరుద్ఘాటించారు.