ఒక కేసులో స్థానిక కోర్టు నుంచి బెయిల్ పొందిన కొద్దిసేపటికే, కాకినాడ జిల్లా సర్పవరం పోలీసులు బుధవారం రాత్రి ఆయనను వేరొక కేసులో అరెస్ట్ చేయడం గమనార్హం. ప్రస్తుతం పోలీసుల విచారణ ఎదుర్కొంటున్న ప్రశ్న రావణ్, అధికారుల ప్రశ్నలకు ఏమాత్రం సమాధానాలు చెప్పకుండా అసహకారం ప్రదర్శిస్తున్నట్లు తెలుస్తోంది.

పాత వివాదాన్ని కుల ఘర్షణగా మార్చారనే ఆరోపణలు

గొల్లప్రోలు పరిధిలోని ఒక పాఠశాలలో 2025లో చోటుచేసుకున్న ఒక గొడవను కులాల మధ్య ఘర్షణగా చిత్రీకరిస్తూ యూట్యూబ్‌లో వీడియోలు అప్‌లోడ్ చేశారనే ఫిర్యాదు ఆధారంగా సర్పవరం పోలీసులు ఈ తాజా కేసు నమోదు చేశారు. ఈ అంశంపై పోలీసులు ప్రశ్నించగా, తాను ఎలాంటి సమాధానాలు ఇవ్వబోనని నిందితుడు స్పష్టం చేసినట్లు సమాచారం. అంతేకాకుండా, తన అరెస్టుకు సంబంధించిన దృశ్యాలను కూడా యూట్యూబ్‌లో అప్‌లోడ్ చేసుకుని వ్యూస్, ఆదాయం సంపాదించుకుంటానని ఆయన వ్యాఖ్యానించినట్లు పోలీసులు వెల్లడించారు. ఈ క్రమంలో నిందితుడిని గురువారం సాయంత్రం న్యాయస్థానంలో హాజరుపరచనున్నారు.

Prashna Ravan arrested: ముఖ్యమంత్రి, ఉప ముఖ్యమంత్రిపై అనుచిత వ్యాఖ్యల కేసు

గత జూన్ 28న ఏలూరు నగరంలో దళిత క్రైస్తవ సంఘాలు నిర్వహించిన నిరసన సభలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్‌లను ఉద్దేశించి ప్రశ్న రావణ్ తీవ్ర వ్యాఖ్యలు చేశారు. దీనిపై పిఠాపురానికి చెందిన జనసేన నాయకుడు పోలీసులకు ఫిర్యాదు చేయడంతో కేసు నమోదైంది. ఈ కేసు దర్యాప్తులో భాగంగా హైదరాబాద్‌లో అరెస్టయిన ప్రశ్న రావణ్‌ను పోలీసులు పిఠాపురం తీసుకువచ్చి కోర్టులో ప్రవేశపెట్టగా న్యాయమూర్తి వ్యక్తిగత పూచీకత్తుపై బెయిల్ మంజూరు చేశారు. అయితే, ఆ సంతోషం ఎంతోసేపు నిలవకుండానే సర్పవరం పోలీసులు ఆయనను మరో కేసు నిమిత్తం మళ్లీ అదుపులోకి తీసుకున్నారు.

Epaper: epaper.vaartha.com

ప్రకాశ్ రాజ్‌ను సినీ పరిశ్రమ నుంచి తొలగించాలి: బీజేపీ నేత డిమాండ్