ప్రధాని నరేంద్ర మోదీ తన ఐరోపా పర్యటనలో భాగంగా నార్వేలో జరిపిన పర్యటన ఇరు దేశాల దౌత్య సంబంధాలలో ఒక మైలురాయిగా నిలిచిపోయింది. నార్వే రాజధాని ఓస్లోలో ఆ దేశ ప్రధానమంత్రి జోనాస్ గహర్ స్టోర్‌తో ప్రధాని మోదీ జరిపిన ద్వైపాక్షిక చర్చలు అత్యంత ఫలప్రదంగా సాగాయి.

ఈ సందర్భంగా ఇరు దేశాల మధ్య సంబంధాలను మరింత ఉన్నత స్థాయికి తీసుకెళ్తూ 'గ్రీన్ స్ట్రాటెజిక్ పార్టనర్‌షిప్' (Green Strategic Partnership) ను ప్రకటించారు. ఈ చారిత్రాత్మక పరిణామాన్ని ఉద్దేశించి ప్రధాని మోదీ మాట్లాడుతూ.. భారత్-నార్వే బంధానికి ఇది ఒక సువర్ణ అధ్యాయమని (స్వర్ణయుగం) అభివర్ణించారు. భారతదేశపు అపారమైన మానవ వనరులు, మార్కెట్ వేగానికి, నార్వే దేశపు అత్యాధునిక సాంకేతికత, పెట్టుబడులు తోడైతే ప్రపంచ స్థాయి పరిష్కారాలను కనుగొనవచ్చని ఆయన ఆశాభావం వ్యక్తం చేశారు.

Read Also : యూఏఈలోని బరకా అణు కేంద్రంపై డ్రోన్ దాడిని ఖండించిన భారత్

కీలక రంగాలలో ఒప్పందాలు.. డిజిటల్, క్లీన్ ఎనర్జీపై ఫోకస్!

ఈ వ్యూహాత్మక భాగస్వామ్యంలో భాగంగా పర్యావరణ పరిరక్షణ, సుస్థిర అభివృద్ధే లక్ష్యంగా ఇరు దేశాలు పలు కీలక రంగాలలో పరస్పర సహకారాన్ని పెంపొందించుకోనున్నాయి. ముఖ్యంగా క్లీన్ ఎనర్జీ (స్వచ్ఛమైన ఇంధనం), గ్రీన్ షిప్పింగ్, బ్లూ ఎకానమీ (సముద్ర వనరుల అభివృద్ధి), హెల్త్ కేర్, డిజిటల్ టెక్నాలజీ, ఆర్టిఫిషియల్ ఇంటెలిజెన్స్ (AI), మరియు రోబోటిక్స్ వంటి ఎమర్జింగ్ టెక్నాలజీస్ రంగాలలో కలిసి పనిచేసేందుకు ఇరు దేశాలు అంగీకరించాయి. ఇటీవలే అమల్లోకి వచ్చిన 'భారత్-ఇఎఫ్టీఏ' (India-EFTA) ఆర్థిక భాగస్వామ్య ఒప్పందం ద్వారా రాబోయే 15 ఏళ్లలో నార్వేతో సహా ఇతర సభ్య దేశాల నుండి దాదాపు 100 బిలియన్ డాలర్ల పెట్టుబడులను ఆకర్షించడమే కాకుండా, భారతదేశంలో 10 లక్షల ఉద్యోగాల సృష్టిని లక్ష్యంగా పెట్టుకున్నట్లు ప్రధాని వివరించారు.

మిలిటరీ చర్యలతో సమస్యలు తీరవు.. చర్చలే ఏకైక మార్గం: ప్రధాని మోదీ

ప్రస్తుతం ప్రపంచవ్యాప్తంగా నెలకొన్న భౌగోళిక రాజకీయ ఉద్రిక్తతలపై (Geopolitical Tensions) ప్రధాని మోదీ ఈ వేదికపై నుండి కీలక వ్యాఖ్యలు చేశారు. రష్యా-ఉక్రెయిన్ సంక్షోభం, అలాగే పశ్చిమాసియా (మిడిల్ ఈస్ట్) లో జరుగుతున్న ఘర్షణలను ప్రస్తావిస్తూ.. ప్రపంచం ప్రస్తుతం తీవ్ర అనిశ్చితిని ఎదుర్కొంటోందని ఆందోళన వ్యక్తం చేశారు. కేవలం సైనిక చర్యల వల్ల లేదా యుద్ధాల వల్ల ఏ సమస్యకూ శాశ్వత పరిష్కారం లభించదని ఆయన స్పష్టం చేశారు. ఎలాంటి వివాదాలనైనా కేవలం దౌత్యపరమైన చర్చలు, దౌత్యనీతి (Dialogue and Diplomacy) ద్వారానే పరిష్కరించుకోవడం సాధ్యమవుతుందని మోదీ గట్టిగా పునరుద్ఘాటించారు. శాంతి స్థాపన కోసం అంతర్జాతీయ సమాజం తీసుకునే ప్రతి అడుగుకు భారత్ ఎల్లప్పుడూ మద్దతు ఇస్తుందని ఈ సందర్భంగా ఆయన స్పష్టం చేశారు.