Hyderabad Metro: హైదరాబాద్ నగరం నలుమూలలకూ మెట్రో సేవలను విస్తరించడమే లక్ష్యంగా తెలంగాణ ప్రభుత్వం భారీ ప్రణాళికలు సిద్ధం చేసింది. సుమారు 38,595 కోట్ల భారీ బడ్జెట్‌తో రెండో దశ విస్తరణ పనుల కోసం కేంద్రానికి ప్రతిపాదనలు పంపింది.

ముఖ్యమంత్రి రేవంత్ రెడ్డి స్వయంగా ఢిల్లీ వెళ్లి కేంద్ర మంత్రికి సమగ్ర ప్రాజెక్టు నివేదికను అందించారు. ఈ కొత్త ప్రాజెక్టు అందుబాటులోకి వస్తే దాదాపు 122 కిలోమీటర్ల మేర కొత్త మెట్రో లైన్లు వస్తాయి. దీనివల్ల ట్రాఫిక్ కష్టాలు తగ్గడమే కాకుండా ప్రయాణ సమయం ఆదా అవుతుంది. పాతబస్తీ నుంచి ఎయిర్‌పోర్ట్ వరకు మెట్రో పరుగులు పెట్టనుంది.

Read also: IPS Sumathi Malkajgiri CP: ఐపీఎస్ అధికారిణినే వస్తావా.. నీ రేటు ఎంత అని అడిగిన పోకిరీలు..

Hyderabad Metro Phase 2 expansion map

Hyderabad Metro: ఏడు కొత్త కారిడార్లతో రవాణా విప్లవం

రెండో దశలో భాగంగా మొత్తం ఏడు మార్గాల్లో మెట్రో రైళ్లను నడపాలని ప్రభుత్వం నిర్ణయించింది. నాగోల్ నుంచి శంషాబాద్ విమానాశ్రయం వరకు 36 కిలోమీటర్ల మేర నిర్మించే కారిడార్ అత్యంత కీలకం కానుంది. రాయదుర్గం నుంచి కోకాపేట మీదుగా నియోపోలిస్ వరకు, మియాపూర్ నుంచి పటాన్‌చెరువు వరకు లైన్లను పొడిగిస్తారు. చాలా కాలంగా పెండింగ్‌లో ఉన్న ఎంజీబీఎస్ నుంచి చంద్రాయణగుట్ట వరకు మెట్రో లైన్ కూడా ఇందులో ఉంది. ఐటీ కారిడార్ నుంచి శివారు ప్రాంతాల వరకు అనుసంధానం పెంచడం వల్ల సామాన్యులకు రవాణా సౌకర్యం సులభతరం అవుతుంది.

స్కిల్ యూనివర్సిటీ వరకు మూడో దశ

శంషాబాద్ ఎయిర్‌పోర్ట్ నుంచి ఫ్యూచర్ సిటీలో నిర్మిస్తున్న స్కిల్ యూనివర్సిటీ వరకు మూడో దశ మెట్రోను ప్రతిపాదించారు. దాదాపు 40 కిలోమీటర్ల పొడవు ఉండే ఈ మార్గంలో అండర్‌గ్రౌండ్, ఎలివేటెడ్, భూమిపైనే నడిచే ట్రాక్‌లు ఉంటాయి. ఎయిర్‌పోర్ట్ నుంచి కేవలం 40 నిమిషాల్లోనే స్కిల్ యూనివర్సిటీకి చేరుకునేలా దీనిని రూపొందించారు. ఈ మార్గంలో మొత్తం 16 స్టేషన్లు ఏర్పాటు చేయాలని అధికారులు భావిస్తున్నారు. ఈ ప్రాజెక్టు పూర్తయితే హైదరాబాద్ అంతర్జాతీయ స్థాయిలో రవాణా సౌకర్యాలు కలిగిన మెగా సిటీగా అవతరిస్తుంది.