Land Acquisition Compensation: ఆంధ్రప్రదేశ్ హైకోర్టు భూసేకరణ పరిహారం పెంపునకు సంబంధించి ఒక కీలకమైన మరియు చట్టపరమైన స్పష్టతను ఇచ్చింది. భూమిని ప్రభుత్వం అధికారికంగా స్వాధీనం చేసుకున్న తర్వాత కాలానికి సంబంధించిన మార్కెట్ విలువ (Market Value) సర్టిఫికెట్ల ఆధారంగా బాధితులు పరిహారం పెంపును డిమాండ్ చేయలేరని హైకోర్టు అత్యున్నత ధర్మాసనం స్పష్టం చేసింది.

అంతేకాకుండా, ఇళ్ల స్థలాల మార్కెట్ విలువలను ప్రాతిపదికగా చూపిస్తూ.. తాము కోల్పోయిన వ్యవసాయ భూములకు అధిక పరిహారం ఇవ్వాలని కోరడం చట్టప్రకారం చెల్లదని కోర్టు తేల్చిచెప్పింది.

ఈ మేరకు వై.ఎస్.ఆర్ కడప జిల్లాకు చెందిన వేంపల్లి ఖాసిం సాహెబ్‌, గుండ్లూరు పీరమ్మలు దాఖలు చేసిన సివిల్ అప్పీలును హైకోర్టు పూర్తిగా కొట్టివేస్తూ తీర్పు వెలువరించింది.

Read Also:BYST : ఏపీ ప్రభుత్వంతో BYST ఒప్పందం!

2002 నాటి అసైన్డ్ పట్టాల రద్దు.. ఇళ్ల స్థలాల సేకరణ

ఈ కేసుకు సంబంధించిన పూర్తి పూర్వాపరాల్లోకి వెళితే.. కడప జిల్లా సి.కె. దిన్నె మండలంలోని కొన్ని భూములను అప్పీలుదారుల (ఖాతాదారుల) పూర్వీకులకు ప్రభుత్వం 2002లో అసైన్డ్ భూములుగా (Assigned Lands) మంజూరు చేసింది. అయితే, ఆ తర్వాత 2004వ సంవత్సరంలో పేదలు, బలహీన వర్గాల ప్రజలకు ఇళ్ల స్థలాల పంపిణీ (House Sites Distribution) చేపట్టేందుకు ప్రభుత్వం ఒక నిర్ణయం తీసుకుంది. ఇందులో భాగంగా గతంలో ఇచ్చిన ఆ పట్టాలను రద్దు చేస్తూ, సదరు భూములను ప్రభుత్వం తిరిగి తన ఆధీనంలోకి తీసుకుంది (స్వాధీనం చేసుకుంది).

కడప కోర్టును ఆశ్రయించిన బాధితులు

పట్టాల రద్దుపై బాధితులు తొలుత జాయింట్ కలెక్టర్ (Joint Collector) ను ఆశ్రయించారు. దీనిపై విచారణ జరిపిన జేసీ.. భూసేకరణ చట్టం (Land Acquisition Act) నిబంధనల ప్రకారం వారికి తగిన నష్టపరిహారం, 30 శాతం సోలాటియం, అదనపు ఆర్థిక ప్రయోజనాలతో పాటు చట్టబద్ధమైన వడ్డీలను చెల్లించాలని అధికారులను ఆదేశించారు.

అయితే, జేసీ ఆదేశాల అనంతరం రెవెన్యూ అధికారులు నిర్ణయించిన పరిహారం మొత్తం చాలా తక్కువగా ఉందంటూ ఖాసిం సాహెబ్‌, పీరమ్మలు అభ్యంతరం వ్యక్తం చేశారు. తమ భూములకు చదరపు గజానికి (Per Square Yard) రూ. 600 చొప్పున పరిహారం చెల్లించాలని డిమాండ్ చేస్తూ కడప జిల్లా కోర్టులో సివిల్ దావాలు దాఖలు చేశారు. అయితే, అక్కడ తగిన ఆధారాలు లేకపోవడంతో కడప కోర్టు ఈ దావాలను కొట్టివేసింది. దాంతో బాధితులు తుది న్యాయం కోసం రాష్ట్ర హైకోర్టును ఆశ్రయించారు.