బిహార్ సీఎంను చంపేస్తామంటూ బెదిరింపులు..గుజరాత్‌లో నిందితుడి అరెస్ట్

బిహార్ నూతన ముఖ్యమంత్రిగా బాధ్యతలు చేపట్టిన కొద్దిరోజులకే సమ్రాట్ చౌధరీకి ప్రాణహాని తలపెడతామంటూ సోషల్ మీడియాలో బెదిరింపులు రావడం రాష్ట్రవ్యాప్తంగా కలకలం రేపింది.

ఈ ఘటనపై స్పందించిన పోలీసులు నిందితుడిని వేగంగా గుర్తించి అదుపులోకి తీసుకున్నారు.

CM Samrat Chaudhary

CM Samrat Chaudhary: సోషల్ మీడియాలో వైరల్ అయిన ఆడియో క్లిప్

కొద్దిరోజుల క్రితం సోషల్ మీడియా వేదికగా ఒక ఆడియో క్లిప్ విపరీతంగా వైరల్ అయ్యింది. ఆ రికార్డింగ్‌లో ఒక వ్యక్తి ముఖ్యమంత్రి సమ్రాట్ చౌధరీని అత్యంత అసభ్య పదజాలంతో దూషించడమే కాకుండా, ఆయనను చంపేస్తానంటూ బహిరంగంగా హెచ్చరించాడు. ముఖ్యమంత్రి స్థాయి వ్యక్తికి ఇలాంటి బెదిరింపులు రావడంతో పోలీసు యంత్రాంగం ఒక్కసారిగా అప్రమత్తమైంది. ముఖ్యమంత్రి సమ్రాట్ చౌధరీ స్వగ్రామం మరియు ఆయన ప్రాతినిధ్యం వహిస్తున్న తారాపూర్ అసెంబ్లీ నియోజకవర్గం పరిధిలోని ముంగేర్ జిల్లా, సంగ్రాంపూర్ పోలీస్ స్టేషన్‌లో ఈ వ్యవహారంపై కేసు నమోదైంది. సాంకేతిక ఆధారాల సాయంతో పోలీసులు విచారణను వేగవంతం చేశారు. ముంగేర్ జిల్లా ఎస్పీ సయ్యద్ ఇమ్రాన్ మసూద్ తెలిపిన వివరాల ప్రకారం.. వైరల్ ఆడియోను సాంకేతికంగా విశ్లేషించిన పోలీసులు, అది శేఖర్ అనే వ్యక్తికి చెందినదిగా గుర్తించారు. నిందితుడి స్వగ్రామానికి వెళ్లిన పోలీసులకు, అతడు గత కొంతకాలంగా గుజరాత్‌లోని అహ్మదాబాద్‌లో ఉంటూ పనిచేస్తున్నాడని తెలిసింది. బిహార్ పోలీసులు ఒక ప్రత్యేక బృందాన్ని అహ్మదాబాద్‌కు పంపించి, అక్కడి స్థానిక పోలీసుల సహాయంతో దాదాపు 30-35 ఏళ్ల వయస్సు గల నిందితుడు శేఖర్‌ను అరెస్ట్ చేశారు. ప్రస్తుతం నిందితుడిని విచారణ నిమిత్తం అహ్మదాబాద్ నుండి ముంగేర్‌కు తరలిస్తున్నారు. అక్కడ స్థానిక కోర్టులో హాజరుపరిచిన తర్వాత, ఈ బెదిరింపుల వెనుక ఏదైనా కుట్ర ఉందా లేదా వ్యక్తిగత కక్షతో ఇలా చేశాడా అనే కోణంలో పోలీసులు లోతుగా దర్యాప్తు చేయనున్నారు.