Tamil Nadu BJP Leader: తమిళనాడు రాజకీయాల్లో అనూహ్య పరిణామం చోటుచేసుకుంది. రాష్ట్ర బీజేపీ కీలక నేత, మాజీ ఐపీఎస్ అధికారి కె. అన్నామలై ఆ పార్టీకి మంగళవారం (జూన్ 2) రాజీనామా చేశారు.

గత రెండు రోజులుగా ఆయన పార్టీ మారుతున్నారనే ఊహగానాలు జోరుగా సాగుతున్న తరుణంలో ఈ పరిణామం చోటుచేసుకోవడం దేశవ్యాప్తంగా చర్చనీయాంశమైంది.

ఢిల్లీలో బీజేపీ జాతీయ అధ్యక్షుడు నితిన్ నబీన్, కేంద్ర హోం మంత్రి అమిత్ షాలను కలిసిన అనంతరం అన్నామలై తన రాజీనామా లేఖను సమర్పించారు. నితిన్ నబీన్‌తో పాటు పార్టీ జాతీయ ప్రధాన కార్యదర్శి బీఎల్ సంతోష్‌లకు ఐదు పేజీలతో కూడిన సుదీర్ఘ లేఖను ఆయన అందజేశారు. అయితే, అన్నామలై రాజీనామాను బీజేపీ అధిష్ఠానం మాత్రం ఇప్పటివరకు ఆమోదించలేదు.

Read Also : IMD On Monsoon : వేగంగా కదులుతున్న రుతుపవనాలు..పలు రాష్ట్రాల్లో వర్షాలు

Annamalai resigns from BJP.. steps towards a new party?

Tamil Nadu BJP Leader: కొత్త పొలిటికల్ ప్లాట్‌ఫామ్ ప్రకటన?

బీజేపీని వీడిన అన్నామలై.. భవిష్యత్తులో కొత్తగా ఒక రాజకీయ వేదికను ఏర్పాటుచేసుకుంటారనే ప్రచారం జోరుగా సాగుతోంది. జూన్ 4న తన పుట్టిన రోజును పురస్కరించుకుని ఆయన తన రాజకీయ భవిష్యత్తు మరియు కొత్త ప్రణాళికలపై అధికారిక ప్రకటన చేసే అవకాశం ఉందని తెలుస్తోంది.

'తమిళ గుర్తింపు' లక్ష్యంగా కొత్త ప్రాంతీయ పార్టీ!

విశ్వసనీయ వర్గాల సమాచారం ప్రకారం.. మాజీ ఐపీఎస్ అయిన అన్నామలై ‘లౌకిక’, ‘తమిళ-కేంద్రీకృత’ దృక్పథంతో ఒక సరికొత్త ప్రాంతీయ పార్టీని ప్రారంభించాలని గట్టిగా యోచిస్తున్నారు. ప్రతిపాదిత ఈ కొత్త పార్టీని రాబోయే ఆరు నుంచి ఎనిమిది నెలల్లోగా ప్రజల్లోకి తీసుకెళ్లాలని ఆయన భావిస్తున్నారు. తమిళనాడులోని అధికార డీఎంకే, అన్నాడీఎంకే ద్రావిడ పార్టీలతో పాటు బీజేపీకి కూడా ప్రత్యామ్నాయంగా ఈ పార్టీని నిలపాలని లక్ష్యంగా పెట్టుకున్నారు. తమిళ గుర్తింపును జాతీయ దృక్పథంతో మేళవించి, అదే సమయంలో ప్రత్యర్థి పార్టీలను సమస్యల ఆధారంగా గట్టిగా వ్యతిరేకించే ఒక బలమైన రాజకీయ వేదికను అన్నామలై ఊహించుకుంటున్నట్లు ఆయన సన్నిహితులు చెబుతున్నారు. తమిళనాడులో పార్టీ రాజకీయ వ్యూహాలు, విధానాల విషయంలో అన్నామలైకి, బీజేపీ కేంద్ర నాయకత్వానికి కొన్నాళ్లుగా తీవ్ర విభేదాలు నెలకొన్నాయి. ఈ నేపథ్యమే ఆయన రాజీనామాకు ప్రధాన కారణంగా కనిపిస్తోంది. రాష్ట్రంలో అన్నాడీఎంకే తో పొత్తును పునరుద్ధరించడం, రాబోయే అసెంబ్లీ ఎన్నికలకు ముందు అభ్యర్థుల ఎంపికతో సహా పలు కీలక అంశాలపై కేంద్ర నాయకత్వం వ్యవహరించిన తీరుపై అన్నామలై తీవ్ర అసంతృప్తితో ఉన్నట్లు సమాచారం.