Modi : భారత రాజకీయ చరిత్రలో సరికొత్త రికార్డు నమోదవ్వబోతోంది. భారత ప్రధానమంత్రి నరేంద్ర మోదీ ఈనెల 10న (జూన్ 10, 2026) ఒక అరుదైన మైలురాయిని అధిగమించి సరికొత్త రికార్డును నెలకొల్పనున్నారు.

సార్వత్రిక ఎన్నికల ద్వారా ప్రజాస్వామ్యబద్ధంగా ఎన్నికైన ఒక ప్రధాని, దేశంలో అత్యంత ఎక్కువ కాలం ఆ పదవిలో కొనసాగిన ప్రజాస్వామ్య ప్రధానిగా ('ఎలక్టెడ్ పీఎం') ఆయన నిలవబోతున్నారు. ఈనెల 10 నాటికి ప్రధాని మోదీ పదవీకాలం మొత్తం 4,399 రోజులకు చేరుకుంటుంది. దీనితో ఇప్పటివరకు భారతదేశ తొలి ప్రధాని పండిట్ జవహర్‌లాల్ నెహ్రూ పేరిట ఉన్న సుదీర్ఘ కాలపు రికార్డు బద్దలు కానుంది. నెహ్రూ గారు దేశంలో మొదటి సార్వత్రిక ఎన్నికల తర్వాత, మే 13, 1952 నుండి మే 27, 1964 లో ఆయన కన్నుమూసే వరకు మొత్తం 4,398 రోజుల పాటు దేశాన్ని ప్రధానిగా నడిపించారు.

Read Also : సీఎం గా ప్రమాణం చేయగానే కీలక నిర్ణయాలు తీసుకున్న డీకే శివకుమార్

నెహ్రూ రికార్డును అధిగమించి అగ్రస్థానానికి మోదీ

2014 మే 26న దేశ ప్రధానిగా తొలిసారి బాధ్యతలు స్వీకరించిన నరేంద్ర మోదీ, ప్రస్తుతం వరుసగా మూడో టర్మ్ ప్రధానిగా తన పగ్గాలను విజయవంతంగా కొనసాగిస్తున్నారు. దేశంలో అత్యంత తీవ్రమైన రాజకీయ పోటీ, ప్రాంతీయ పార్టీల ప్రభావం ఉన్న ప్రస్తుత తరుణంలో ఆయన ఈ రికార్డును అందుకోవడం విశేషం. కాంగ్రెస్ ఏకఛత్రాధిపత్యం నడిచిన కాలంలో నెహ్రూ నెలకొల్పిన ఈ రికార్డును, ఒక నాన్-కాంగ్రెస్ ప్రధానిగా మోదీ అధిగమించడం రాజకీయ వర్గాల్లో హాట్ టాపిక్‌గా మారింది. గతంలోనే (జూలై 25, 2025న) ఇందిరా గాంధీ నిరంతర పదవీకాల రికార్డును (4,077 రోజులు) అధిగమించిన మోదీ, ఇప్పుడు జూన్ 10 నాటికి నెహ్రూ రికార్డును సైతం దాటి దేశంలోనే అత్యధిక కాలం పాలించిన ఎలక్టెడ్ పీఎంగా సరికొత్త అధ్యాయాన్ని లిఖించనున్నారు.