దేశంలో సిలిండర్, పెట్రోల్, డీజిల్ ధరల భారం ఇప్పటికే సామాన్యుడి నడుము విరుస్తుండగా, పర్యావరణహిత ఇంధనంగా భావించే సీఎన్‌జీ (CNG) ధరలు కూడా వరుసగా పెరగడం వాహనదారులను తీవ్ర ఆందోళనకు గురిచేస్తోంది.

తాజాగా కేంద్ర ప్రభుత్వం కిలో సీఎన్‌జీపై మరో రూపాయి పెంచుతూ నిర్ణయం తీసుకుంది. మధ్యతరగతి ప్రజలు, ముఖ్యంగా ఆటోలు, క్యాబ్‌లు నడుపుకుంటూ జీవించే రవాణా రంగ కార్మికులకు ఈ ధరల పెంపు కోలుకోలేని దెబ్బగా మారింది. కాలుష్యాన్ని తగ్గించడంతో పాటు తక్కువ ఖర్చుతో ప్రయాణించవచ్చని భావించి సీఎన్‌జీ వాహనాలను కొనుగోలు చేసిన యజమానులకు ఈ తాజా నిర్ణయం తీవ్ర నిరాశను మిగిల్చింది.

Read Also : సీబీఐ చేతికి నీట్ కింగ్ పిన్స్ కులకర్ణి, మనీషా.. లీకేజీ గుట్టు వీడేనా?!

రెండు రోజుల్లోనే రూ. 3 పెంపు.. సామాన్యుడిపై మోయలేని భారం!

ఈ ధరల పెంపులోని అసలు తీవ్రత ఏమిటంటే.. కేవలం 48 గంటల వ్యవధిలోనే వాహనదారులపై రెండుసార్లు భారం పడింది. రెండు రోజుల క్రితమే కేంద్ర ప్రభుత్వం సీఎన్‌జీపై రూ. 2 పెంచగా, ఆ షాక్ నుంచి కోలుకోకముందే ఇప్పుడు మరో రూపాయి అదనంగా పెంచింది. దీనితో రెండు రోజుల స్వల్ప వ్యవధిలోనే కిలో సీఎన్‌జీ ధర ఏకంగా రూ. 3 మేర పెరిగినట్లయింది. అంతర్జాతీయ మార్కెట్‌లో సహజ వాయువు ధరల్లో వస్తున్న మార్పులు, సరఫరా గొలుసులో తలెత్తిన ఇబ్బందుల వల్లే ఈ ధరలను సవరించాల్సి వచ్చిందని అధికారులు చెబుతున్నప్పటికీ, సామాన్యుడి బడ్జెట్‌పై ఇది తీవ్ర ప్రభావాన్ని చూపుతోంది.

రవాణా రంగంపై ప్రభావం.. పెరగనున్న నిత్యావసరాల ధరలు!

వరుసగా పెరుగుతున్న సీఎన్‌జీ ధరల ప్రభావం కేవలం వాహనదారులకే పరిమితం కాకుండా, సమాజంలోని అన్ని వర్గాలపై పడే అవకాశం ఉంది. సీఎన్‌జీ ధరల పెరుగుదల వల్ల ఆటో, లారీ, డెలివరీ వాహనాల నిర్వహణ ఖర్చులు గణనీయంగా పెరుగుతాయి. దీనివల్ల ప్రయాణికుల ఛార్జీలతో పాటు, నగరాల్లో నిత్యావసర వస్తువులు, పాలు, కూరగాయల రవాణా ఖర్చులు కూడా ఎక్కువవుతాయి. ఫలితంగా బహిరంగ మార్కెట్‌లో వస్తువుల ధరలు పెరిగి, ద్రవ్యోల్బణం మరింత ఎక్కువయ్యే ప్రమాదం ఉందని ఆర్థిక నిపుణులు హెచ్చరిస్తున్నారు. ప్రభుత్వం ఇప్పటికైనా స్పందించి ఇంధన ధరలను నియంత్రించాలని ప్రజలు కోరుతున్నారు.