ఏప్రిల్ 1 నుంచి టోల్ వద్ద నగదు రద్దు.. యూపీఐతో టోల్ చెల్లింపు

NHAI New Toll Rules: దేశవ్యాప్తంగా జాతీయ రహదారులపై ప్రయాణించే వాహనదారులకు కేంద్ర ప్రభుత్వం కీలక సమాచారం అందించింది. నేషనల్ హైవేస్ అథారిటీ ఆఫ్ ఇండియా నిబంధనల ప్రకారం, రేపటి నుంచి (ఏప్రిల్ 1) టోల్ ప్లాజాల వద్ద నగదు చెల్లింపులను పూర్తిగా నిలిపివేయనున్నారు.

ఇకపై కేవలం డిజిటల్ పద్ధతుల్లో మాత్రమే స్వీకరిస్తారు. టోల్ ప్లాజాల వద్ద వాహనాల రద్దీని తగ్గించడం, ప్రయాణ సమయాన్ని ఆదా చేయడం ఈ మార్పు ప్రధాన లక్ష్యం. నగదు రహిత విధానం వల్ల టోల్ వసూళ్లలో పారదర్శకత పెరుగుతుందని, వాహనాలు వేగంగా కదలడం వల్ల ఇంధన వినియోగం తగ్గి కాలుష్యం కూడా తగ్గుతుందని అధికారులు భావిస్తున్నారు.

New rules on national highways to come into effect from April 1

NHAI New Toll Rules: ఫాస్టాగ్ లేదా యూపీఐ తప్పనిసరి

ఇకపై టోల్ ప్లాజాల వద్ద వాహనదారులు తమ ఫాస్టాగ్ (FASTag) ద్వారా లేదా క్యూఆర్ కోడ్ స్కాన్ చేసి యూపీఐ (UPI) ద్వారా మాత్రమే చెల్లింపులు చేయాల్సి ఉంటుంది. ఒకవేళ వాహనానికి ఫాస్టాగ్ లేకపోయినా లేదా అందులో తగినంత బ్యాలెన్స్ లేకపోయినా జరిమానా విధించే అవకాశం ఉంది. కొన్ని సందర్భాల్లో అటువంటి వాహనాలను టోల్ గేట్ల వద్ద నిలిపివేసే ఆస్కారం కూడా ఉందని హెచ్చరించారు. నెట్‌వర్క్ సమస్యల కారణంగా యూపీఐ లావాదేవీలు కొన్నిసార్లు ఆలస్యం కావచ్చని, కాబట్టి ఫాస్టాగ్‌ను ఎల్లప్పుడూ రీఛార్జ్ చేసి సిద్ధంగా ఉంచుకోవడం ఉత్తమమని అధికారులు సూచిస్తున్నారు.

ప్రయాణికులు తీసుకోవాల్సిన జాగ్రత్తలు

ఈ కొత్త నిబంధన వల్ల ఇబ్బందులు కలగకుండా ఉండాలంటే వాహనదారులు

మీ వాహనానికి ఉన్న ఫాస్టాగ్ యాక్టివ్‌గా ఉందో లేదో ముందే సరిచూసుకోండి.
ప్రయాణానికి ముందే ఫాస్టాగ్ వాలెట్‌లో తగినంత బ్యాలెన్స్ ఉండేలా చూసుకోండి.
ఫాస్టాగ్‌ను మీ బ్యాంకు ఖాతాతో సరిగ్గా లింక్ చేయండి.
అత్యవసర పరిస్థితుల కోసం మీ స్మార్ట్‌ఫోన్‌లో పని చేసే యూపీఐ యాప్‌ను (GPay, PhonePe మొదలైనవి) సిద్ధంగా ఉంచుకోండి.

భారతీయ రహదారుల వ్యవస్థను మరింత వేగవంతంగా, సమర్థవంతంగా మార్చడంలో ఈ నిర్ణయం ఒక కీలక ముందడుగుగా నిలవనుంది. నగదు రహిత ప్రయాణంతో ప్రయాణికులకు వేగవంతమైన ప్రయాణ అనుభవం కలగనుంది.