భరత్ సాయినాథ్ వర్మ, యశు మాశెట్టి జంటగా నటించిన ఈ చిత్రం జులై 16 (గురువారం) నుంచి డిజిటల్ ప్రేక్షకులను అలరిస్తోంది. సాయి తరుణ్ దర్శకత్వం వహించిన ఈ మిడిల్ క్లాస్ ఫ్యామిలీ డ్రామా వస్తోంది.

Read Also: Bhagyanagaramlo Saradhi Prema : యూత్ ను కట్టిపడేసిన 'భాగ్యనగరంలో సారథి ప్రేమ'

OTT Review of the Family Drama ‘Madhurapuri Sadana’!

Madhurapuri Sadana movie: కథ

హైదరాబాదులో వాసు (శ్రీనివాస్ భోగిరెడ్డి) ఒక ప్రభుత్వ ఉద్యోగి. పదవీ విరమణకి దగ్గరలో ఉన్న అతనికి భార్య పద్మ, కొడుకు కృష్ణ (భరత్ సాయినాథ్) ఉంటారు. కూతురు అమెరికాలో సెటిల్ అవుతుంది. కొడుకు కృష్ణ కూడా అమెరికా వెళ్లి సెటిల్ అవ్వాలనేది వాసు కోరిక. కానీ కృష్ణకి సినిమా దర్శకుడిగా మారాలనే బలమైన ఆశయం ఉంటుంది. ఈ విషయంలో తండ్రీకొడుకుల మధ్య అసంతృప్తి నెలకొంటుంది.

మరోవైపు కృష్ణ తన కాలనీలోని అదితి (యశు మాశెట్టి)ని ప్రేమిస్తాడు. అయితే ఆమె కూడా అతను విదేశాలకు వెళ్లి జాబ్ సంపాదించాలనే కోరుకుంటుంది. ఇదిలా ఉంటే, కృష్ణ తల్లికి తమకంటూ ఒక సొంత ఇల్లు లేదనే అసంతృప్తి ఉంటుంది. తల్లి కోరికను తీర్చడం కోసం అమెరికా నుంచి కూతురు కొంత డబ్బు పంపిస్తుంది. ఇంటి పనులు చకచకా మొదలవుతాయి కానీ, కొంత దూరం వెళ్లాక ఆగిపోతాయి. ఆ తర్వాత ఆ ఇల్లు పూర్తి చేయడం ఆ కుటుంబానికి ఒక పెద్ద సవాలుగా మారుతుంది. ఈ క్రమంలో తండ్రి దాచుకున్న డబ్బు బావమరిది చేతిలో మోసపోవడం, హీరో ఇంటి కాగితాలను వేరొకరి దగ్గర తాకట్టు పెట్టడం లాంటి సమస్యలు తలెత్తుతాయి. ఈ గందరగోళం నుండి ఆ కుటుంబం ఎలా బయటపడింది? కృష్ణ తన ఆశయాన్ని ఎలా నెరవేర్చుకున్నాడు? అనేదే మిగతా కథ.

విశ్లేషణ

జీవితంలో చాలామందికి ఒక ఆశయం ఉంటుంది. అయితే ఫ్యామిలీ పరిస్థితుల కారణంగానో, కన్నవాళ్ల కోసమో తమ ఆశయాన్ని పక్కన పెట్టవలసి వస్తుంది. ఇలాంటి ఆటంకాలు ఎన్ని ఎదురైనా, వాటిని తట్టుకుంటూ ముందుకు వెళ్లిన ఒక యువకుడి కథను ఇందులో చూపించారు. ఎదిగిన పిల్లల కెరియర్ విషయంలో పేరెంట్స్ పడే భయం, ఆర్థిక భద్రత లేకపోతే లైఫ్ పార్ట్నర్ పడే కంగారు, అలాగే స్నేహితుడిపై ఫ్రెండ్స్ కి ఉండే నమ్మకాన్ని దర్శకుడు ఇందులో బాగా హైలైట్ చేశారు. కుటుంబంలో ఒకరిని సంప్రదించకుండా మరొకరు నిర్ణయాలు తీసుకుంటే ఆ ఫ్యామిలీ ఎలాంటి ప్రమాదంలో పడుతుందో, సమస్యలు వచ్చినప్పుడు ఒకరికొకరు ఎలా అండగా నిలబడాలో ఈ చిత్రం చక్కగా ఆవిష్కరించింది.

మిడిల్ క్లాస్ ఫ్యామిలీ ఎమోషన్స్, తండ్రీకొడుకుల మధ్య వచ్చే కొన్ని సీన్లు బాగానే వర్కౌట్ అయ్యాయి. సహాయ నటుల పర్ఫార్మెన్స్ ఆకట్టుకుంటుంది. లవ్ ట్రాక్ చాలా పైపైన తేల్చేశారు. హీరో-హీరోయిన్ల పరిచయం చాలా ఆర్టిఫీషియల్ గా అనిపిస్తుంది. కామెడీలో బలం లేదు. అలాగే హీరో దర్శకుడు కావడానికి చేసే ప్రయత్నాలకు సంబంధించిన బలమైన షాట్స్ లేకపోవడం, ఇల్లు కట్టే సీన్లకు, బావమరిది మోసం చేసే ఎపిసోడ్ కి అనవసరమైన లెంగ్త్ కేటాయించడం బోర్ కొట్టిస్తుంది.

నటీనటుల పనితీరు

హీరోగా నటించిన భరత్ తన నటనపై మరికొంత ఫోకస్ పెట్టవలసి ఉంది. హీరోయిన్ యశు మాశెట్టికి తన నటనను నిరూపించుకునేంత స్క్రీన్ స్పేస్ దక్కలేదు. హీరో ఫ్రెండ్స్ గా కనిపించిన కమెడియన్స్ బాగానే చేసినా, కామెడీ ట్రాక్ లో బలం లేకపోవడం వల్ల పెద్దగా నవ్వించలేకపోయారు. శ్రీనివాస్ భోగిరెడ్డి తన పాత్రకు న్యాయం చేశారు. ఫోటోగ్రఫీ, బ్యాక్‌గ్రౌండ్ స్కోర్ పర్వాలేదనిపిస్తాయి. ఎడిటింగ్ ఓ మాదిరిగా ఉంది.

ముగింపు

టైటిల్ చూడగానే ఇదొక అందమైన ప్రేమకథ అనుకుంటారు కానీ, ఇది సొంత ఇంటి కోసం ఒక మిడిల్ క్లాస్ ఫ్యామిలీ పడే కష్టం. తన డ్రీమ్ ను నిజం చేసుకుంటూ, పేరెంట్స్ కలను నెరవేర్చడానికి నిలబడిన యువకుడి కథగా వచ్చిన ఈ చిత్రం ఓటీటీలో ఓ మాదిరి కేటగిరి టాక్ తో నిలిచిపోతుంది.

Epaper: epaper.vaartha.com

ఓటీటీలోకి వచ్చేసిన సమంత 'మా ఇంటి బంగారం'