Garividi Lakshmi Twitter Review: ఆనంది, రాగ్ మయూర్, నరేశ్, రాశి ప్రధాన పాత్రల్లో నటించిన చిత్రం 'గరివిడి లక్ష్మీ'. ఉత్తరాంధ్రకు చెందిన ప్రముఖ బుర్రకథ కళాకారిణి గరివిడి లక్ష్మీ జీవితం ఆధారంగా ఈ సినిమాను రూపొందించారు.
ఈ చిత్రంలో ఎల్‌బీ శ్రీరామ్, అవసరాల శ్రీనివాస్, అంకిత్ కోయ్య, షకలక శంకర్, శరణ్య ప్రదీప్, కంచరపాలెం కిశోర్, నితిన్ ప్రసన్న, వైవా రాఘవ తదితరులు కీలక పాత్రల్లో కనిపించారు. పీపుల్ మీడియా ఫ్యాక్టరీ పతాకంపై టీజీ విశ్వప్రసాద్, కృతి ప్రసాద్ ఈ చిత్రాన్ని నిర్మించగా.. గౌరి నాయుడు జమ్ము దర్శకత్వ బాధ్యతలు చేపట్టారు. ఆదిత్య జవ్వాది సినిమాటోగ్రఫీ అందించగా, రవి తేజ గిరిజాల ఎడిటింగ్ చేశారు. చరణ్ అర్జున్ సంగీతాన్ని సమకూర్చారు.
టీజర్, ట్రైలర్‌తో పాటు చిత్ర బృందం చేపట్టిన ప్రచార కార్యక్రమాలు 'గరివిడి లక్ష్మీ'పై ప్రేక్షకుల్లో ఆసక్తిని పెంచాయి. ఈ సినిమా అక్టోబర్ 17న ప్రపంచవ్యాప్తంగా థియేటర్లలో విడుదలైంది. అంతకుముందు అక్టోబర్ 16 రాత్రి ప్రీమియర్ షోలు ప్రదర్శించారు. ఈ క్రమంలో సినిమా చూసిన ప్రేక్షకులు, సినీ విమర్శకులు సోషల్ మీడియా వేదికగా తమ అభిప్రాయాలను పంచుకుంటున్నారు. మరి 'గరివిడి లక్ష్మీ' సినిమా ఎలా ఉంది? కథ, నటీనటుల ప్రదర్శనపై నెటిజన్లు ఏమంటున్నారు? వారి స్పందనలు ఎలా ఉన్నాయో ఇప్పుడు చూద్దాం.
Garividi Lakshmi Movie: గరివిడి లక్ష్మి సినిమా రివ్యూ
Garividi Lakshmi Movie Twitter Review
Garividi Lakshmi Twitter Review: సోషల్ మీడియా రెస్పాన్స్
ఒక నెటిజన్ స్పందిస్తూ.. సినిమా చాలా అందంగా, హృదయాన్ని తాకేలా ఉందని పేర్కొన్నారు. గుర్తింపులో ఏర్పడిన గందరగోళం తొలగి, చివరకు అసలైన గరివిడి లక్ష్మీని చూడటం ఎంతో ఆనందాన్ని ఇచ్చిందని తెలిపారు. టైటిల్ రోల్‌లో ఆనంది అద్భుతంగా నటించారని ప్రశంసించారు.
మరో ప్రేక్షకుడు బుర్రకథ సన్నివేశాల్లో ఆనంది నటన ప్రత్యేక ఆకర్షణగా నిలిచిందని అభిప్రాయపడ్డారు. ఆమె కెరీర్‌లో గుర్తుండిపోయే ప్రదర్శనగా ఈ పాత్ర నిలుస్తుందని, రాగ్ మయూర్ కూడా తన నటనతో భావోద్వేగాలను సహజంగా పలికించారని కామెంట్ చేశారు.
ఎలాంటి అతిశయోక్తులకు తావులేకుండా, ప్రేక్షకులకు భావోద్వేగపరంగా చేరువయ్యేలా ఈ బయోపిక్‌ను తెరకెక్కించారని మరో నెటిజన్ పేర్కొన్నారు. ముఖ్యంగా బుర్రకథ సన్నివేశాల్లో ఆనంది సహజమైన నటన ఆకట్టుకుందని, జానపద నేపథ్యం, హృద్యమైన బ్యాక్‌గ్రౌండ్ మ్యూజిక్ సినిమాకు మరింత బలాన్ని చేకూర్చాయని రాసుకొచ్చారు.
ప్రీమియర్ షో చూసిన మరో ప్రేక్షకుడు ఫస్టాఫ్, ముఖ్యంగా ఇంటర్వెల్ తర్వాత వచ్చిన సన్నివేశాలపై సానుకూల అభిప్రాయాన్ని వ్యక్తం చేశారు. ఇలాంటి కథలు గతంలోనూ వచ్చినప్పటికీ, ప్రస్తుత తరానికి గరివిడి లక్ష్మీ వంటి కళాకారుల గురించి పెద్దగా తెలియదని పేర్కొన్నారు. ఈ సినిమా మంచి విజయాన్ని అందుకోవాలని, ఉత్తరాంధ్రకే పరిమితం కాకుండా గరివిడి లక్ష్మీ జీవితం గురించి దేశవ్యాప్తంగా ప్రేక్షకులకు తెలియాలని ఆకాంక్షించారు.
ఆనంది నటనపై మరో నెటిజన్ ప్రశంసలు కురిపించారు. ఇంత సహజంగా, బలమైన పాత్రలో తెలుగు నటిని ప్రధాన పాత్రలో చూడటం సంతోషంగా ఉందని హర్షం వ్యక్తం చేశారు. మరో ప్రేక్షకుడు కూడా ఆనంది నటనలోని భావోద్వేగాల లోతు, బుర్రకథ సన్నివేశాల్లో ఆమె హావభావాలు అద్భుతంగా ఉన్నాయని పేర్కొంటూ, ఈ పాత్ర ఆమె కెరీర్‌లో ప్రత్యేకంగా నిలిచిపోతుందని అభిప్రాయపడ్డారు. రాగ్ మయూర్ నటనను కూడా ప్రశంసించారు.
ఇక సినిమా ఫస్టాఫ్‌పై స్పందించిన ఓ నెటిజన్.. ఉత్తరాంధ్ర జానపద పాటలు, గరివిడి లక్ష్మీ జీవిత ప్రయాణాన్ని తెరపై చూపించిన తీరు ఆకట్టుకుందని తెలిపారు. ఆనంది తన పాత్రలో పూర్తిగా ఒదిగిపోయారని, రాగ్ మయూర్, షకలక శంకర్ తమ పాత్రలకు న్యాయం చేశారని కామెంట్ చేశారు.
మొత్తంగా చూస్తే, ప్రీమియర్ షోల నుంచి వచ్చిన తొలి స్పందనల్లో ఆనంది నటన, ఉత్తరాంధ్ర జానపద నేపథ్యం, బుర్రకథ సన్నివేశాలు ప్రధానంగా ప్రశంసలు అందుకుంటున్నాయి. అయితే ఇవి తొలి ప్రేక్షకుల అభిప్రాయాలు మాత్రమే. సినిమా పూర్తి స్థాయి ఆదరణ, బాక్సాఫీస్ ఫలితం ఎలా ఉంటాయో వేచి చూడాలి.
Epaper: epaper.vaartha.com
కీర్తి సురేష్ బర్త్‌డే స్పెషల్.. 'జనవరి 12 విడుదల' ఫస్ట్ లుక్ అవుట్