సోషల్ మీడియా యుగంలో ఏది ఎప్పుడు వైరల్ అవుతుందో ఊహించడం కష్టం. తాజాగా ఒక వింతైన వార్త ప్రపంచవ్యాప్తంగా నెటిజన్లను విపరీతంగా ఆకర్షిస్తోంది. పొరుగు దేశమైన బంగ్లాదేశ్‌లో ఒక గేదెకు ఏకంగా అమెరికా అధ్యక్షుడు 'డొనాల్డ్ ట్రంప్' పేరు పెట్టడం ఇప్పుడు హాట్ టాపిక్‌గా మారింది.

ఆ దేశంలోని ఒక డెయిరీ ఫామ్‌లో ఉన్న ఈ గేదెకు ఆ పేరు పెట్టడం వెనుక ఒక ఆసక్తికరమైన కారణం ఉంది. దాదాపు 700 కిలోల భారీ బరువున్న ఈ గేదెను చూడటానికి స్థానికులు, జంతు ప్రేమికులు పెద్ద ఎత్తున తరలివస్తున్నారు. దీంతో ఈ పెంపుడు జంతువు రాత్రికి రాత్రే అంతర్జాతీయంగా వార్తల్లోకెక్కింది.

Read Also : చిల్కూరు బాలాజీ ఆలయంపై అమెరికా సెనేటర్ అనుచిత వ్యాఖ్యలు

ట్రంప్ హెయిర్ స్టైల్, పింక్ స్కిన్.. పేరు పెట్టడానికి అసలు కారణం!

సాధారణంగా గేదెలు నలుపు లేదా ముదురు గోధుమ రంగులో ఉంటాయి. కానీ, బంగ్లాదేశ్‌కు చెందిన ఈ గేదె మాత్రం చాలా ప్రత్యేకంగా జన్మించింది. దీని శరీరంపై బంగారు రంగు జుట్టు (Golden Hair), గులాబీ రంగు చర్మం (Pink Skin) ఉన్నాయి. ఈ గేదె యొక్క చర్మం రంగు, ముఖ్యంగా దాని తలపై ఉన్న జుట్టు శైలి (Hair Style) మరియు రంగు.. అమెరికా అధ్యక్షుడు డొనాల్డ్ ట్రంప్‌ను పోలి ఉండటంతో యజమానులు దానికి ‘డొనాల్డ్ ట్రంప్’ అని నామకరణం చేశారు. ట్రంప్ హెయిర్ స్టైల్ ప్రపంచవ్యాప్తంగా ఎంత ఫేమస్సో తెలిసిందే. సరిగ్గా అదే లుక్ ఈ గేదెకు కూడా మ్యాచ్ కావడంతో ఈ వింత నిర్ణయం తీసుకున్నట్లు ఫామ్ నిర్వాహకులు వెల్లడించారు.

సోషల్ మీడియాలో ఫొటోలు వైరల్.. మరో గేదెకు నెతన్యాహు పేరు!

ఈ ‘ట్రంప్’ గేదెకు సంబంధించిన ఫొటోలు, వీడియోలు ప్రస్తుతం సోషల్ మీడియా ప్లాట్‌ఫారమ్‌లలో తెగ వైరల్ అవుతున్నాయి. నెటిజన్లు దీని లుక్‌ను చూసి ఆశ్చర్యపోతూ రకరకాల కామెంట్లు, మీమ్స్ షేర్ చేస్తున్నారు. అయితే, ఈ ఫామ్‌లోని వింతలు ఇక్కడితో ఆగలేదు. ఇదే డెయిరీ ఫామ్‌లో ఉన్న మరొక విలక్షణమైన గేదెకు ఇజ్రాయెల్ ప్రధానమంత్రి బెంజమిన్ ‘నెతన్యాహు’ పేరును కూడా పెట్టడం విశేషం. ప్రపంచ దేశాల అధినేతల పేర్లను తమ మూగజీవాలకు పెడుతూ, ఈ బంగ్లాదేశ్ పెంపుడు జంతువుల యజమానులు సరికొత్త పబ్లిసిటీతో అందరి దృష్టిని ఆకర్షిస్తున్నారు.