Madhuranagar Crime: హైదరాబాద్‌లోని పంజాగుట్ట డివిజన్ పరిధిలో విషాదం చోటుచేసుకుంది. మధురానగర్ పోలీస్ స్టేషన్ పరిధిలోని ఓ లేడీస్ హాస్టల్ టెర్రస్‌పై ఒంటరిగా నివసిస్తున్న ఒక మహిళ అనుమానాస్పద స్థితిలో ప్రాణాలు కోల్పోవడం స్థానికంగా కలకలం రేపింది.

హైదరాబాద్: నగరంలోని మధురానగర్ పోలీస్ స్టేషన్ పరిధిలో ఉన్న భార్గవి లేడీస్ హాస్టల్ భవనంపై సోమవారం సాయంత్రం ఒక మహిళ విగతజీవిగా కనిపించడం కలకలం సృష్టించింది. హాస్టల్ భవనం పైభాగంలో ఉన్న టెర్రస్‌పై నివసిస్తున్న హారిక (40) అనే మహిళ, అక్కడి బాత్రూంలోనే మృతి చెంది పడి ఉండటాన్ని గమనించిన వారు వెంటనే పోలీసులకు సమాచారం అందించారు.

Read also: Red Fort Bomb Blast: ఎర్రకోట కేసులో ఎన్‌ఐఏ భారీ స్కెచ్.. 10 మంది నిందితులు, 7500 పేజీల చిట్టా!

రెండు రోజుల క్రితమే మృతి?

ఘటనా స్థలానికి చేరుకున్న పోలీసులు అణువణువూ గాలించి ఆధారాలను సేకరించారు. మృతదేహం ఉబ్బిపోయి, దుర్వాసన వస్తుండటంతో.. హారిక మృతి చెంది సుమారు రెండు రోజులు అయి ఉండొచ్చని పోలీసులు ప్రాథమికంగా భావిస్తున్నారు. ఆమె స్వస్థలం ఆంధ్రప్రదేశ్‌లోని గుంటూరు జిల్లా అని, గత కొంతకాలంగా ఆమె ఇక్కడ ఒంటరిగా నివసిస్తున్నారని విచారణలో తేలింది.

Madhuranagar Crime: హత్యా? ప్రమాదమా?

బాత్రూంలోనే ఆమె మృతదేహం లభించడంతో, స్నానం చేసే సమయంలోనో లేక కాలు జారి పడిపోవడం వల్లనో తలకు గాయమై మరణించి ఉండవచ్చని పోలీసులు అనుమానిస్తున్నారు. అయితే, ఆమె ఒంటరిగా ఉండటం వల్ల ప్రమాదం జరిగిన సమయంలో సహాయం చేసేవారు లేక ప్రాణాలు పోయి ఉండొచ్చని భావిస్తున్నారు. అయినప్పటికీ, ఇది కేవలం ప్రమాదమా లేక దీని వెనుక మరేదైనా కారణం ఉందా అనే కోణంలో పోలీసులు దర్యాప్తు జరుపుతున్నారు.

దర్యాప్తు ముమ్మరం

క్లూస్ టీమ్ సభ్యులు ఘటనా స్థలంలో వేలిముద్రలు మరియు ఇతర కీలక ఆధారాలను సేకరించారు. మృతదేహాన్ని పోస్టుమార్టం నిమిత్తం ఉస్మానియా ఆసుపత్రికి తరలించారు. నివేదిక వచ్చిన తర్వాతే ఆమె మరణానికి గల అసలు కారణాలు తెలుస్తాయని పోలీసులు వెల్లడించారు. ఈ ఘటనపై కేసు నమోదు చేసుకున్న మధురానగర్ పోలీసులు, హారిక కుటుంబ సభ్యులకు సమాచారం అందించారు.