హర్మూజ్‌పై ఇరాన్ ఉక్కుపిడికిలి: అంతర్జాతీయ నౌకాయానానికి కొత్త సవాళ్లు

పశ్చిమాసియాలో ముదురుతున్న ఉద్రిక్తతల నేపథ్యంలో, ప్రపంచ చమురు రవాణాకు గుండెకాయ వంటి హర్మూజ్ జలసంధిని పూర్తిగా తన గుప్పిట్లోకి తీసుకోవాలని ఇరాన్ నిర్ణయించింది.

ఇందుకోసం పార్లమెంటులో కొత్త చట్టాన్ని ప్రవేశపెడుతూ సంచలన నిర్ణయాలు తీసుకుంటోంది. ఇరాన్ పార్లమెంటరీ సివిల్ ఇంజనీరింగ్ కమిటీ ఛైర్మన్ మహమ్మద్ రెజాయ్‌ కూచీ వెల్లడించిన వివరాల ప్రకారం, రూపొందుతున్న కొత్త ముసాయిదా చట్టంలోని ప్రధానాంశాలు ఇవే.

Strait of Hormuz

ఇజ్రాయెల్‌కు చెందిన లేదా ఆ దేశంతో సంబంధం ఉన్న ఏ నౌకనూ జలసంధి గుండా వెళ్లనివ్వరు. ఇరాన్ శత్రు దేశాలుగా పరిగణించే దేశాల నౌకలు ప్రయాణించాలంటే, ఇరాన్ జాతీయ భద్రతా మండలి నుండి ముందస్తు అనుమతి తీసుకోవడం తప్పనిసరి. గతంలో ఇరాన్‌కు ఆర్థికంగా లేదా మరే రకమైన నష్టం కలిగించిన దేశాలు, ఆ బకాయిలను చెల్లిస్తేనే వారి నౌకలకు అనుమతి లభిస్తుంది. జలసంధి గుండా ప్రయాణించే నౌకలు తమ రుసుమును కేవలం ఇరాన్ కరెన్సీ (రియాల్) లోనే చెల్లించాల్సి ఉంటుంది. ఇది అంతర్జాతీయ వాణిజ్య నియమాలపై పెద్ద ప్రభావం చూపే అవకాశం ఉంది.

Strait of Hormuz: పాకిస్థాన్ వేదికగా రెండో విడత శాంతి చర్చలు

ఒకవైపు ఉద్రిక్తతలు కొనసాగుతుండగానే, మరోవైపు దౌత్యపరమైన ప్రయత్నాలు మొదలయ్యాయి. పాకిస్థాన్ వేదికగా అమెరికా-ఇరాన్ మధ్య రెండో విడత శాంతి చర్చలకు రంగం సిద్ధమైంది. సోమవారం అమెరికా ప్రతినిధులు పాక్ చేరుకుంటారని డొనాల్డ్ ట్రంప్ ప్రకటించారు. తాము ప్రతిపాదించిన ఒప్పందానికి ఇరాన్ అంగీకరించకపోతే, ఆ దేశంలోని విద్యుత్ కేంద్రాలు, వంతెనలను ధ్వంసం చేస్తామని ఆయన తీవ్ర హెచ్చరికలు జారీ చేశారు. చర్చలపై ట్రంప్ ప్రకటన చేసినప్పటికీ, ఇరాన్ నుండి ఇప్పటి వరకు ఎటువంటి అధికారిక స్పందన రాలేదు. కాల్పుల విరమణ ఒప్పందం గడువు మరో రెండు రోజుల్లో ముగియనుండటంతో, మంగళవారం పాకిస్థాన్‌లో జరగబోయే చర్చలు ప్రపంచ దేశాలకు అత్యంత కీలకంగా మారాయి. ఒకవేళ ఇరాన్ తన కొత్త చట్టాన్ని అమలు చేస్తే, అంతర్జాతీయ ఇంధన ధరలు ఆకాశాన్ని తాకే ప్రమాదం ఉంది.