హెరిటేజ్ ఫుడ్స్ క్యూ4 ఫలితాలను పరిశీలిస్తే, సంస్థ మొత్తం ఆదాయం రూ. 1157.56 కోట్లుగా నమోదైంది. ఇది గతేడాది ఇదే సమయంతో పోలిస్తే 10 శాతం వృద్ధి.

అయితే, ఆదాయం పెరిగినప్పటికీ నికర లాభం మాత్రం రూ. 38.16 కోట్ల నుంచి రూ. 23.94 కోట్లకు పడిపోయింది. దీనికి ప్రధాన కారణం వ్యయాలు విపరీతంగా పెరగడమే. పాల సేకరణ ఖర్చులు పెరగడం, ప్రతికూల వాతావరణ పరిస్థితులు మరియు దేశవ్యాప్తంగా నెలకొన్న పాల కొరత డెయిరీ పరిశ్రమపై తీవ్ర ప్రభావాన్ని చూపాయని సంస్థ ఎగ్జిక్యూటివ్ డైరెక్టర్ నారా బ్రాహ్మణి వెల్లడించారు. వ్యయాలు రూ. 990 కోట్ల నుంచి రూ. 1132 కోట్లకు పెరగడం వల్ల మార్జిన్లపై ఒత్తిడి పెరిగింది.

Read Also : హైదరాబాద్‌లో స్థిరంగా బంగారం ధరలు.. ఈరోజు రేట్లు ఇవే

స్టాక్ మార్కెట్‌లో హెరిటేజ్ ప్రయాణం

మార్కెట్ పరంగా చూస్తే, హెరిటేజ్ షేర్లు గత కొంతకాలంగా ఒడిదుడుకులకు లోనవుతున్నాయి. మే 11న ఫలితాల వెల్లడికి ముందు షేరు ధర 4.33 శాతం లాభంతో రూ. 378.30 వద్ద ముగిసింది. అయితే, చారిత్రక గరిష్టాలతో పోలిస్తే ఈ స్టాక్ భారీగా పతనమైంది. 2024 ఎన్నికల ఫలితాల సమయంలో రూ. 727 వద్ద ఆల్ టైమ్ గరిష్టాన్ని తాకిన షేరు, అక్కడి నుండి దాదాపు 60 శాతం మేర విలువను కోల్పోయింది. గత ఆరు నెలల్లోనే 20 శాతం పతనం కావడం గమనార్హం. ప్రస్తుతం సంస్థ మార్కెట్ విలువ రూ. 3.51 వేల కోట్లుగా ఉంది. శామీర్‌పేటలో కొత్త ఐస్‌క్రీం ప్లాంట్‌ను ప్రారంభించడం ద్వారా భవిష్యత్తులో వృద్ధి సాధిస్తామన్న ధీమాను యాజమాన్యం వ్యక్తం చేస్తోంది.

యాజమాన్యం మరియు వ్యాపార విస్తరణ

1992లో ప్రస్తుత ఏపీ సీఎం నారా చంద్రబాబు నాయుడు స్థాపించిన ఈ సంస్థ, ప్రస్తుతం ఆయన కుటుంబ సభ్యుల పర్యవేక్షణలో నడుస్తోంది. నారా భువనేశ్వరి వైస్ ఛైర్‌పర్సన్‌గా, నారా బ్రాహ్మణి ఎగ్జిక్యూటివ్ డైరెక్టర్‌గా వ్యవహరిస్తున్నారు. రెండు తెలుగు రాష్ట్రాలతో పాటు కర్ణాటక, తమిళనాడు, మహారాష్ట్ర, ఢిల్లీ వంటి రాష్ట్రాల్లో హెరిటేజ్ తన కార్యకలాపాలను విస్తరించింది. కేవలం పాలు మాత్రమే కాకుండా పెరుగు, నెయ్యి, పన్నీర్, ఫ్లేవర్డ్ మిల్క్ వంటి విలువ ఆధారిత ఉత్పత్తులపై సంస్థ ఎక్కువగా దృష్టి సారిస్తోంది. వాతావరణం అనుకూలించి పాల సేకరణ ధరలు తగ్గితే, రాబోయే త్రైమాసికాల్లో లాభాల బాట పట్టే అవకాశం ఉందని విశ్లేషకులు భావిస్తున్నారు.