Double Bedroom Houses: తెలంగాణలో డబుల్ బెడ్‌రూమ్ ఇళ్ల కేటాయింపులపై ప్రభుత్వం కీలక నిర్ణయం తీసుకుంది. ఇళ్లు కేటాయించినప్పటికీ వాటిలో నివాసం ఉండని లబ్ధిదారులకు చివరి అవకాశం కల్పించింది.
ఇప్పటికే రెండు విడతలుగా నోటీసులు ఇచ్చినా స్పందించని లబ్ధిదారులు ఇకపై ఇళ్లలోకి చేరాలని గృహనిర్మాణ శాఖ స్పష్టం చేసింది.
Read Also :Indiramma Illu: లబ్ధిదారులకు అలాట్‌మెంట్ లెటర్లు.. నేటి నుంచే పంపిణీ!
వారం రోజుల్లో ఇంట్లోకి రాకపోతే కేటాయింపు రద్దు
మూడేళ్ల క్రితం డబుల్ బెడ్‌రూమ్ ఇళ్లు కేటాయించినప్పటికీ వాటికి తాళాలు వేసి ఖాళీగా ఉంచిన లబ్ధిదారులకు తాజాగా బహిరంగ ప్రకటన ద్వారా నోటీసులు జారీ చేసినట్లు సమాచారం. వారం రోజుల్లోగా ఇళ్లలోకి వచ్చి నివాసం ఉండకపోతే కేటాయింపును శాశ్వతంగా రద్దు చేస్తామని అధికారులు హెచ్చరించారు. రద్దు చేసిన ఇళ్లను అర్హత కలిగిన ఇతర పేదలకు కేటాయించనున్నట్లు స్పష్టం చేశారు.
హైదరాబాద్ పరిధిలో వేలాది ఇళ్లపై దృష్టి
హైదరాబాద్ కోర్ అర్బన్ రీజియన్ (CURE) పరిధిలో పూర్తయిన డబుల్ బెడ్‌రూమ్ ఇళ్లను అర్హులైన పేదలకు అందించేందుకు ప్రభుత్వం చర్యలు చేపడుతోంది. ఇటీవల సుమారు 21 వేల 2BHK ఇళ్ల నిర్మాణ పనులు పూర్తయ్యాయని ప్రభుత్వం వెల్లడించింది. కొత్తగా లబ్ధిదారులను ఎంపిక చేసే ప్రక్రియలో ఇప్పటికే కేటాయించిన ఇళ్లలో నివసించని వారిని గుర్తించి, అవసరమైతే వారి కేటాయింపులను రద్దు చేయాలని అధికారులకు ఆదేశాలు ఇచ్చారు.
ఖాళీగా ఉన్న ఇళ్లను అర్హులకు కేటాయింపు
ఇళ్లు కేటాయించిన తర్వాత కూడా వాటిలో నివసించకుండా ఖాళీగా ఉంచడం వల్ల అర్హులైన మరికొందరు పేదలకు ఇళ్లు అందకుండా పోతున్నాయి. దీంతో ప్రభుత్వం ఇలాంటి ఇళ్లను గుర్తించి, నిబంధనల ప్రకారం కేటాయింపులను రద్దు చేసి కొత్త లబ్ధిదారులను ఎంపిక చేయాలని నిర్ణయించింది. హైదరాబాద్, రంగారెడ్డి, మేడ్చల్-మల్కాజిగిరి జిల్లాల పరిధిలోని 2BHK ఇళ్లపై అధికారులు ప్రత్యేకంగా దృష్టి సారిస్తున్నారు.
Double Bedroom Houses: కొత్త లబ్ధిదారుల ఎంపికకు అవకాశం
ఖాళీగా ఉన్న ఇళ్ల కేటాయింపులు రద్దయితే వాటిని అర్హత కలిగిన కొత్త లబ్ధిదారులకు కేటాయించే అవకాశం ఉంటుంది. ప్రభుత్వం ప్రస్తుతం పూర్తయిన 2BHK ఇళ్లకు కొత్త లబ్ధిదారులను ఎంపిక చేసే ప్రక్రియను కూడా వేగవంతం చేస్తోంది. ఇప్పటికే కేటాయించిన ఇళ్లను నిజంగా అవసరమైన కుటుంబాలు వినియోగించుకునేలా చూడటమే ఈ చర్యల ప్రధాన ఉద్దేశంగా తెలుస్తోంది.