Hardik Pandya : టీమిండియా స్టార్ ఆల్‌రౌండర్, ముంబై ఇండియన్స్ (MI) కెప్టెన్ హార్దిక్ పాండ్య తన అధికారిక ఇన్‌స్టాగ్రామ్ ఖాతాను డీయాక్టివేట్ చేయడం క్రీడా వర్గాల్లో తీవ్ర సంచలనంగా మారింది.

సోషల్ మీడియాలో దాదాపు 46 మిలియన్ల (4.6 కోట్లు) ఫాలోవర్లను కలిగి ఉండి, నిత్యం యాక్టివ్‌గా ఉండే హార్దిక్ పేజీని వెతికిన అభిమానులకు బుధవారం ఒక్కసారిగా 'యూజర్ నాట్ ఫౌండ్' (User not found) లేదా 'సమ్‌థింగ్ వెంట్ రాంగ్' అని చూపించడంతో అంతా షాక్‌కు గురయ్యారు. ఐపీఎల్ 2026 సీజన్ ముగిసిన కేవలం మూడు రోజులకే ఆయన ఈ నిర్ణయం తీసుకోవడం విశేషం. వ్యక్తిగత కారణాల వల్ల లేదా సోషల్ మీడియా నుంచి కొంతకాలం విరామం తీసుకోవాలనే ఉద్దేశంతోనే ఆయన తన ఖాతాను తొలగించి ఉంటారని ప్రాథమికంగా భావిస్తున్నప్పటికీ, దీనిపై హార్దిక్ నుంచి ఎలాంటి అధికారిక ప్రకటన రాలేదు.

Read Also : IPL 2026 క్వాలిఫయర్-1 లో ఊహించని వివాదం.. !!

ఐపీఎల్ 2026 వైఫల్యాలు.. ముంబై ఇండియన్స్‌ను వీడనున్నారనే ప్రచారం!

నిజానికి ఈ ఏడాది ఐపీఎల్ 2026 సీజన్ హార్దిక్ పాండ్యకు, ముంబై ఇండియన్స్ జట్టుకు అస్సలు కలిసిరాలేదు. ఆయన సారథ్యంలో ముంబై జట్టు ఆడిన 14 మ్యాచ్‌లలో కేవలం 4 మాత్రమే గెలిచి, ఏకంగా 10 మ్యాచ్‌లలో ఓడిపోయి పాయింట్ల పట్టికలో 9వ స్థానంతో ఘోరంగా టోర్నీ నుంచి నిష్క్రమించింది. హార్దిక్ సైతం వ్యక్తిగతంగా 10 మ్యాచ్‌లలో కేవలం 206 పరుగులు చేసి, బౌలింగ్‌లో 4 వికెట్లు మాత్రమే తీసి తీవ్రంగా నిరాశపరిచారు. ఈ పేలవ ప్రదర్శన కారణంగా నెటిజన్ల నుంచి ఆయన తీవ్రమైన విమర్శలు, ట్రోలింగ్ ఎదుర్కొన్నారు. వీటికి తోడు, ఇటీవల ఆయన తన ఇన్‌స్టాగ్రామ్‌లో పింక్ కలర్ హైలైట్ అయ్యేలా కొన్ని వస్తువుల ఫోటోలు పోస్ట్ చేయడం, ఫోన్ స్క్రీన్‌పై “07:07” టైమ్‌స్టాంప్ కనిపించడంతో ఆయన ముంబై ఇండియన్స్‌ను వీడి రాజస్థాన్ రాయల్స్ లేదా చెన్నై సూపర్ కింగ్స్ (CSK) జట్టులోకి మారబోతున్నారనే ఊహాగానాలు జోరందుకున్నాయి. ఈ నేపథ్యంలోనే ఆయన ఇన్‌స్టా అకౌంట్ మాయమవ్వడం ఈ మైగ్రేషన్ రూమర్లకు మరింత బలాన్ని చేకూర్చింది.