JEE Advanced 2026 : దేశంలోని ప్రతిష్ఠాత్మక ఐఐటీల్లో ప్రవేశాల కోసం నిర్వహించిన జేఈఈ అడ్వాన్స్‌డ్ 2026 ఫలితాలను ఐఐటీ రూర్కీ విడుదల చేసింది. ఈ ఏడాది ఫలితాల్లో ఐఐటీ ఢిల్లీ జోన్ ఆధిపత్యం చాటుకుంటూ తొలి మూడు ర్యాంకులను కైవసం చేసుకుంది.

అయితే తెలుగు రాష్ట్రాల విద్యార్థులు కూడా జాతీయ స్థాయిలో విశేష ప్రతిభ కనబరిచి అందరి దృష్టిని ఆకర్షించారు.

టాప్-10లో ముగ్గురు తెలుగు విద్యార్థులు

ఈసారి జేఈఈ అడ్వాన్స్‌డ్ ఫలితాల్లో ముగ్గురు తెలుగు విద్యార్థులు టాప్-10లో చోటు సంపాదించడం ప్రత్యేక ఆకర్షణగా నిలిచింది. హైదరాబాద్‌కు చెందిన మోహిత్ శేఖర్ శుక్లా 319 మార్కులతో ఆలిండియా 4వ ర్యాంక్ సాధించి తెలంగాణ టాపర్‌గా నిలిచాడు. విశాఖపట్నానికి చెందిన కూచి సందీప్ 318 మార్కులతో 5వ ర్యాంక్ పొందగా, పెందుర్తికి చెందిన మేడిశెట్టి నాగ సహర్ష 312 మార్కులతో 9వ ర్యాంక్ సాధించాడు.

వీరి విజయంతో తెలుగు రాష్ట్రాలు మరోసారి జాతీయ స్థాయిలో తమ ప్రతిభను నిరూపించాయి. గత ఏడాది టాప్-10లో ఒకే ఒక్క తెలుగు విద్యార్థి ఉండగా, ఈసారి ముగ్గురు విద్యార్థులు చోటు దక్కించుకోవడం విశేషం.

కటాఫ్ మార్కులు పెరిగిన పరీక్ష

ఈ ఏడాది జేఈఈ అడ్వాన్స్‌డ్ కటాఫ్ మార్కులు గతంతో పోలిస్తే గణనీయంగా పెరిగాయి. జనరల్ కేటగిరీ కటాఫ్ 92 మార్కులకు చేరుకోగా, ఓబీసీ మరియు ఈడబ్ల్యూఎస్ కేటగిరీలకు 82 మార్కులు నిర్ణయించారు. ఎస్సీ, ఎస్టీ కేటగిరీలకు 46 మార్కులు కటాఫ్‌గా ప్రకటించారు. మొత్తం 1,79,694 మంది విద్యార్థులు పరీక్షకు హాజరుకాగా, వారిలో 56,880 మంది కౌన్సెలింగ్‌కు అర్హత సాధించారు. అర్హత పొందిన విద్యార్థులకు ఐఐటీలు, ఎన్‌ఐటీలు, ట్రిపుల్ ఐటీల్లో ప్రవేశాల కోసం జోసా కౌన్సెలింగ్ ప్రక్రియ త్వరలో ప్రారంభం కానుంది.

Read also: Sathupalli Singareni : సత్తుపల్లి సింగరేణి ఓపెన్ కాస్ట్ బొగ్గు గనుల్లో ప్రమాదం