Tamil Nadu: తమిళనాడులో లంచం డిమాండ్ చేసిన, గూగుల్ పే (Google Pay) ద్వారా స్వీకరించిన వేర్వేరు ఘటనలపై వారం రోజుల వ్యవధిలో ఐదుగురు పోలీసు సిబ్బందిపై శాఖాపరమైన తీవ్ర చర్యలు తీసుకున్నారు.
తిరునెల్వేలి, చెన్నై, దాని చుట్టుపక్కల ప్రాంతాల్లో రూ. 1,000 నుంచి రూ. 10,000 వరకు డిజిటల్ రూపంలో లంచాలు స్వీకరించినట్లు నమోదైన కేసుల ఆధారంగా ఈ చర్యలు చేపట్టారు.
Bribe via GPay… Five police personnel suspended!
Tamil Nadu: వాహన తనిఖీల్లో గూగుల్ పే నంబర్ షేర్
మొదటి ఘటనలో, తిరునెల్వేలి నగరంలోని మేళపాళయం పోలీస్ స్టేషన్‌కు చెందిన హెడ్ కానిస్టేబుల్ సోర్ణ రాజ్ సాధారణ వాహన తనిఖీలు చేపట్టారు. ఆ సమయంలో సరైన పత్రాలు లేవనే సాకుతో ఒక ద్విచక్ర వాహనదారుడిని రూ. 1,000 డిమాండ్ చేశారు. బాధితుడి వద్ద నగదు లేకపోవడంతో సదరు హెడ్ కానిస్టేబుల్ తన గూగుల్ పే నంబర్‌ను షేర్ చేసి డిజిటల్ రూపంలో లంచం స్వీకరించడంతో ఆయనపై సస్పెన్షన్ వేటు పడింది.
దొంగిలించిన బైక్ విడుదల కోసం రూ. 10,000 లంచం
మరొక ఘటనలో, చెన్నైలోని నార్త్ బీచ్ పోలీస్ స్టేషన్‌కు చెందిన సబ్-ఇన్‌స్పెక్టర్ శివరాజ్, కానిస్టేబుల్ వివేక్ దొంగిలించబడిన ద్విచక్ర వాహనాన్ని విడుదల చేయడానికి రూ. 10,000 లంచం డిమాండ్ చేశారు. బాధితుడు ఈ మొత్తాన్ని గూగుల్ పే ద్వారా చెల్లించినట్లు విజిలెన్స్ విభాగానికి ఆధారాలు లభించాయి. అంతర్గత విజిలెన్స్ సెల్ నిర్వహించిన విచారణలో ఆరోపణలు రుజువు కావడంతో ఆ ఇద్దరు పోలీసు అధికారులను కూడా ఉన్నతాధికారులు సస్పెండ్ చేశారు.