జులై లో యూకే కు కొత్త ప్రధాని ప్రమాణ స్వీకారం

UK PM : యూనైటెడ్ కింగ్‌డమ్ (UK) రాజకీయాల్లో ఊహించని భారీ మార్పు చోటుచేసుకుంది. అధికార లేబర్ పార్టీకి చెందిన బ్రిటన్ ప్రధానమంత్రి కీర్ స్టార్మర్ తన పదవి నుంచి తప్పుకుంటున్నట్లు అధికారికంగా ప్రకటించారు.

సొంత పార్టీ ఎంపీలు, మంత్రుల నుంచే గత కొంతకాలంగా ప్రభుత్వంపై విమర్శలు, అసంతృప్తి పెరుగుతుండటంతో ఆయన ఈ నిర్ణయం తీసుకోక తప్పలేదు. ముఖ్యంగా లేబర్ పార్టీకి చెందిన ప్రముఖ నేత, గ్రేటర్ మాంచెస్టర్ మాజీ మేయర్ ఆండీ బర్న్‌హ్యామ్ ఇటీవల ఉప ఎన్నికల్లో ఘనవిజయం సాధించి పార్లమెంట్‌లో అడుగుపెట్టడంతో స్టార్మర్ నాయకత్వానికి గట్టి సవాల్ ఎదురైంది. ఈ నేపథ్యంలోనే జులై నెలలోనే బ్రిటన్‌కు సరికొత్త ప్రధాని బాధ్యతలు చేపట్టే అవకాశం ఉందని స్టార్మర్ స్పష్టం చేశారు. ప్రస్తుతం ఆండీ బర్న్‌హ్యామ్ అభ్యర్థిత్వానికి పార్టీలో విస్తృత మద్దతు లభిస్తుండటంతో, ఎటువంటి పోటీ లేకపోతే వచ్చే నెలలోనే ఆయన యూకే నూతన ప్రధానిగా పగ్గాలు చేపట్టడం దాదాపు ఖాయంగా కనిపిస్తోంది.

స్టార్మర్ వీడ్కోలు ప్రసంగం.. పాలనా విజయాల సమర్థన!

10 డౌనింగ్ స్ట్రీట్ వేదికగా స్టార్మర్ తన రాజీనామా ప్రకటన చేస్తూ, తన రెండేళ్ల పాలనలో సాధించిన విజయాలను దేశ ప్రజల ముందు బలంగా ఉంచారు. గత ప్రభుత్వాల హయాంలో ఆర్థికంగా, రాజకీయంగా దివాళా తీసిన బ్రిటన్‌ను తాము సరైన బాటలో పెట్టామని ఆయన వాదించారు. తన హయాంలో దేశ ఆర్థిక వ్యవస్థ మునుపటి కంటే ఎంతో బలోపేతమైందని, ద్రవ్యోల్బణాన్ని అధిగమించి ఉద్యోగులు, కార్మికుల వేతనాలు నిరంతరం పెరిగాయని గుర్తుచేశారు. అలాగే, సుమారు ఐదు లక్షల మంది పిల్లలను పేదరికం నుంచి బయటపడేశామని, జాతీయ ఆరోగ్య సేవ (NHS) నిరీక్షణ జాబితాలను రికార్డు స్థాయిలో తగ్గించామని పేర్కొన్నారు. దేశాన్ని పీడిస్తున్న అక్రమ వలసల సమస్యకు (చిన్న పడవల్లో వచ్చే వలసదారులు) గట్టిగా అడ్డుకట్ట వేశామని చెబుతూ.. రాబోయే కొత్త ప్రధానికి తాను మరింత శక్తివంతమైన, సుస్థిరమైన బ్రిటన్‌ను అప్పగిస్తున్నానని స్టార్మర్ ఉద్ఘాటించారు.