Meenakshi Natarajan : తెలంగాణ కాంగ్రెస్ పార్టీలో సీనియర్ నేత మీనాక్షీ నటరాజన్ వ్యవహారం తీవ్ర దుమారం రేపుతోంది. ఆమె రాజ్యసభ (Rajya Sabha) నామినేషన్ అనూహ్యంగా తిరస్కరణకు గురికావడం, దానికి తోడు ఆమెపై ఉన్న పాత కేసు పేపర్లు ప్రత్యర్థి పార్టీ అయిన బీజేపీ చేతికి చిక్కడం అఖిల భారత కాంగ్రెస్ కమిటీ (AICC) వర్గాల్లో తీవ్ర కలకలానికి దారితీసింది.

మీనాక్షీ నటరాజన్ కాంగ్రెస్ అగ్రనేత రాహుల్ గాంధీ కోర్ టీమ్‌లో అత్యంత కీలకమైన సభ్యురాలు కావడంతో, అధిష్ఠానం ఈ మొత్తం వ్యవహారాన్ని చాలా ప్రతిష్టాత్మకంగా తీసుకుంది. రాష్ట్రంలో సొంత పార్టీ అధికారంలో ఉన్నప్పటికీ, ఆమెపై ఉన్న పాత కేసును ఎందుకు కొట్టివేయించలేకపోయారు, పైగా ఆ అత్యంత రహస్య పత్రాలు బీజేపీ నేతలకు ఎలా లీక్ అయ్యాయనే అంశాలపై దిల్లీ పెద్దలు తీవ్ర అసంతృప్తితో ఉన్నట్లు సమాచారం. ఈ లీకేజీ వెనుక పార్టీలోని అంతర్గత శత్రువుల (కోవర్టుల) హస్తం ఉందనే అనుమానాలు ఇప్పుడు గాంధీ భవన్‌లో సెగలు రేపుతున్నాయి.

Read Also : మీనాక్షి నటరాజన్ నామినేషన్ తిరస్కరణపై మండిపడ్డ ఎంపీ చామల!

రంగంలోకి ఇంటెలిజెన్స్.. కోవర్టుల వేటలో సీఎం రేవంత్ రెడ్డి!

ఈ వివాదం తీవ్రరూపం దాల్చడంతో ముఖ్యమంత్రి రేవంత్ రెడ్డి తక్షణ నివారణ చర్యలకు శ్రీకారం చుట్టారు. సీఎం ఆదేశాల మేరకు రాష్ట్ర నిఘా వర్గాలు (Intelligence Departments) రంగంలోకి దిగి, ప్రభుత్వ రహస్యాలను, పార్టీ కీలక పత్రాలను బయటకు చేరవేస్తున్న కోవర్టులపై గుసగుసల ఆధారంగా ఆరా తీస్తున్నాయి. ఇదిలా ఉండగా, నీతి ఆయోగ్ (Niti Aayog) కీలక సమావేశంలో పాల్గొనేందుకు ఇవాళ దిల్లీ వెళ్లనున్న ముఖ్యమంత్రి రేవంత్ రెడ్డి, అక్కడ ఏఐసీసీ అగ్రనేతలతో ప్రత్యేకంగా భేటీ కానున్నారు. ఈ సమావేశంలో మీనాక్షి నామినేషన్ తిరస్కరణకు దారితీసిన పరిస్థితులను వివరించడంతో పాటు, నిఘా వర్గాల ప్రాథమిక నివేదిక ఆధారంగా లీకేజీకి కారకులైన వారిపై తీసుకోబోయే కఠిన చర్యల గురించి అధిష్ఠానానికి నివేదించనున్నట్లు తెలుస్తోంది. ఈ దిల్లీ పర్యటన అనంతరం తెలంగాణ కాంగ్రెస్‌లో కీలక పరిణామాలు చోటుచేసుకునే అవకాశం ఉంది.