ఆంధ్రప్రదేశ్ ముఖ్యమంత్రి నారా చంద్రబాబు నాయుడు నేడు నెల్లూరు జిల్లాలో పర్యటించనున్నారు. జిల్లాలోని కావలి నియోజకవర్గ పరిధిలో గల కాసపాడు (కాసపేట) తీర ప్రాంతంలో నిర్వహించనున్న 'మత్స్యకారుల సేవలో' బహిరంగ సభలో ఆయన ముఖ్య అతిథిగా పాల్గొంటారు.

సముద్రంలో వేట నిషేధ కాలంలో ఉపాధి కోల్పోయే మత్స్యకార కుటుంబాలను ఆదుకోవడమే లక్ష్యంగా ప్రభుత్వం ఈ పర్యటనను అత్యంత ప్రతిష్టాత్మకంగా తీసుకుంది. సీఎం రాకను పురస్కరించుకుని జిల్లా యంత్రాంగం, స్థానిక తెలుగుదేశం పార్టీ (TDP) శ్రేణులు భారీ ఏర్పాట్లు పూర్తి చేశాయి.

Read Also : మైనర్ బాలికలపై లైంగిక వేధింపులు: తెలంగాణలో పెరుగుతున్న పోక్సో కేసులు

రూ.262 కోట్ల వేట నిషేధ భృతి.. నేరుగా ఖాతాల్లోకి!

ఈ పర్యటనలో భాగంగా ముఖ్యమంత్రి చంద్రబాబు నాయుడు రాష్ట్రవ్యాప్తంగా ఉన్న మత్స్యకారులకు భారీ ఆర్థిక సాయాన్ని పంపిణీ చేయనున్నారు. 'మత్స్యకారుల సేవలో' పథకం కింద అర్హులైన 1,30,796 మత్స్యకార కుటుంబాలకు వేట నిషేధ భృతిని అందజేస్తారు. ప్రతి లబ్ధిదారు కుటుంబానికి రూ.20,000 చొప్పున మొత్తం రూ.262 కోట్లను సీఎం చంద్రబాబు ఒకే క్లిక్‌తో నేరుగా వారి బ్యాంకు ఖాతాల్లో జమ చేయనున్నారు. ఏటా సముద్రపు వేటపై నిషేధం విధించే కాలంలో మత్స్యకారులు ఆర్థిక ఇబ్బందులు పడకుండా, వారి జీవనోపాధికి డీబీటీ (DBT) పద్ధతిలో ఈ నిధులు ఎంతగానో దోహదపడతాయని ప్రభుత్వం పేర్కొంది.

మత్స్యకారులతో ముఖాముఖి.. పార్టీ శ్రేణులతో సమీక్ష

ఆర్థిక సాయం విడుదల అనంతరం ముఖ్యమంత్రి చంద్రబాబు నాయుడు స్థానిక మత్స్యకార కుటుంబాలతో ప్రత్యేకంగా ముఖాముఖి (ఇంటరాక్షన్) నిర్వహించనున్నారు. వారి సమస్యలు, వేట రేవుల ఆధునీకీకరణ, కోల్డ్ స్టోరేజ్ సౌకర్యాలు మరియు ఇతర మౌలిక వసతులపై నేరుగా అడిగి తెలుసుకోనున్నారు. ఈ కార్యక్రమం ముగిసిన తర్వాత, నెల్లూరు జిల్లాకు చెందిన మంత్రులు, ఎమ్మెల్యేలు మరియు టీడీపి ముఖ్య నాయకులతో చంద్రబాబు ప్రత్యేకంగా సమీక్షా సమావేశం జరుపుతారు. జిల్లాలో జరుగుతున్న అభివృద్ధి పనులు, రాబోయే స్థానిక ఎన్నికల వ్యూహాలు మరియు పార్టీ బలోపేతంపై ఈ సందర్భంగా ఆయన దిశా నిర్దేశం చేయనున్నారు.