కెప్టెన్ రజత్ పటీదార్ విధ్వంసకర బ్యాటింగ్

IPL 2026: ఐపీఎల్ 2026 (IPL 2026) సీజన్ ముగింపు దశకు చేరుకుంది. అత్యంత ప్రతిష్టాత్మకమైన క్వాలిఫయర్-1 మ్యాచ్‌లో రాయల్ ఛాలెంజర్స్ బెంగళూరు (RCB) కెప్టెన్ రజత్ పటీదార్ కెప్టెన్సీ ఇన్నింగ్స్‌తో అద్భుత విశ్వరూపం ప్రదర్శించాడు.

గుజరాత్ టైటాన్స్ (GT) బౌలింగ్‌ను చీల్చిచెండాడుతూ ఆకాశమే హద్దుగా చెలరేగిపోయాడు. కేవలం 33 బంతుల్లోనే 5 ఫోర్లు, 9 భారీ సిక్సర్ల సాయంతో 93 పరుగులు చేసి నాటౌట్‌గా నిలిచాడు. ఫలితంగా, మొదట బ్యాటింగ్ చేసిన ఆర్సీబీ నిర్ణీత 20 ఓవర్లలో 5 వికెట్ల నష్టానికి 254 పరుగుల భారీ స్కోరు సాధించింది. ఫైనల్ బెర్త్ ఖాయం చేసుకోవడం కోసం గుజరాత్ ముందు కొండంత లక్ష్యాన్ని ఉంచింది.

ipl 2026 qualifier1 rcb vs gt rajat-patidar 93 runs

టాస్ గెలిచిన గుజరాత్.. ఆర్సీబీ బ్యాటర్ల ఎదురుదాడి

ధర్మశాలలోని అందమైన హిమాచల్ ప్రదేశ్ క్రికెట్ అసోసియేషన్ (HPCA) స్టేడియంలో జరుగుతున్న ఈ హై-వోల్టేజ్ మ్యాచ్‌లో టాస్ గెలిచిన గుజరాత్ టైటాన్స్ మొదట బౌలింగ్ ఎంచుకుంది. అయితే, వారి నిర్ణయం తప్పని నిరూపించడానికి ఆర్సీబీ బ్యాటర్లకు ఎక్కువ సమయం పట్టలేదు.

ఓపెనర్ వెంకటేశ్ అయ్యర్ (7 బంతుల్లో 19) మెరుపు ఆరంభం ఇచ్చి రెండో ఓవర్‌లోనే పెవిలియన్ చేరాడు. ఆ తర్వాత స్టార్ బ్యాటర్ విరాట్ కోహ్లీ (25 బంతుల్లో 43), దేవదూత్ పడిక్కల్ (19 బంతుల్లో 30) కలిసి ఇన్నింగ్స్‌ను చక్కదిద్దారు. వీరిద్దరూ రెండో వికెట్‌కు 72 పరుగుల కీలక భాగస్వామ్యాన్ని నెలకొల్పారు. అయితే, జాసన్ హోల్డర్ వేసిన 9వ ఓవర్‌లో కోహ్లీ, పడిక్కల్ వెంటవెంటనే ఔట్ కావడంతో ఆర్సీబీ ఒక దశలో కాస్త ఒత్తిడిలో పడింది.

IPL 2026: పటీదార్ క్లాస్.. రషీద్, సిరాజ్ బౌలింగ్‌లో సిక్సర్ల వర్షం!

వికెట్లు పడి స్కోరు వేగం తగ్గిన సమయంలో క్రీజులోకి వచ్చిన కెప్టెన్ రజత్ పటీదార్ మ్యాచ్ స్వరూపాన్నే మార్చేశాడు. గుజరాత్ బౌలర్లపై కనికరం లేకుండా ఎదురుదాడికి దిగాడు. ఒకవైపు కృనాల్ పాండ్యా (28 బంతుల్లో 43) అతనికి అద్భుతమైన సహకారం అందించగా పటీదార్ 281.82 స్ట్రైక్ రేట్‌తో బౌండరీల వర్షం కురిపించాడు.

వీరిద్దరూ నాలుగో వికెట్‌కు కేవలం 45 బంతుల్లోనే 95 పరుగులు జోడించారు. రషీద్ ఖాన్, మహమ్మద్ సిరాజ్, ప్రసిద్ధ్ కృష్ణ బౌలింగ్‌ను టార్గెట్ చేస్తూ పటీదార్ మైదానం నలుమూలలా సిక్సర్లు బాదాడు. కేవలం 7 పరుగుల తేడాతో సెంచరీ చేజార్చుకున్నప్పటికీ, జట్టుకు భారీ స్కోరు అందించడంలో సఫలమయ్యాడు. ఆఖరిలో జితేశ్ శర్మ (5 బంతుల్లో 15) కూడా ధాటిగా ఆడటంతో బెంగళూరు 250 పరుగుల మార్కును దాటింది. గుజరాత్ బౌలర్లలో హోల్డర్, రబాడ చెరో రెండు వికెట్లు తీసినా భారీగా పరుగులు సమర్పించుకున్నారు. మరి ఇంత పెద్ద టార్గెట్‌ను ఛేదించి గుజరాత్ ఫైనల్‌కు దూసుకెళ్తుందో లేదో చూడాలి.