కేరళను కుదిపేస్తున్న పసికందు హత్య ఉదంతం!

Nedumangad Child Abuse Case: సుమారు రెండు వారాల క్రితం సోషల్ మీడియాలో 18 నెలల పసికందు అర్షిద్, అతని తల్లి అఖిల ఉన్న ఒక చిన్న వీడియో తెగ వైరల్ అయింది.

మే మధ్యలో ఒక యూట్యూబర్ తీసిన ఆ క్లిప్‌లో, ఆ చిన్నారి రెండు చేతులకు ప్లాస్టర్ కాస్ట్‌లు (కట్లు) వేసి ఉన్నాయి. చేతులకు ఏమైందని అడిగితే.. సైకిల్ పైనుంచి పడిపోవడం వల్ల గాయాలయ్యాయని తల్లి అఖిల చెప్పింది. ఆ వీడియో చూసిన నెటిజన్లు కూడా ఆ పిల్లాడు చాలా అల్లరివాడేమోనని తేలికగా నవ్వుకున్నారు. కానీ, ఆ నవ్వుల వెనుక దాగున్న భయంకరమైన నిజం ఎవరూ ఊహించలేకపోయారు. మే 29న ఆ చిన్నారి అర్షిద్ కన్నుమూశాడు. ఆ వైరల్ వీడియోలో కనిపించిన గాయాలు ప్రమాదవశాత్తు జరిగినవి కాదని.. అతని తండ్రి అష్కర్ చేసిన తీవ్రమైన, క్రూరమైన శారీరక దాడికి సాక్ష్యాలని పోలీసులు తేల్చారు. పోస్ట్‌మార్టం నివేదికలో బాలుడి తలలో తీవ్ర రక్తస్రావం (Cranial Bleeding) జరిగిందని, శరీరంలోని వివిధ భాగాల్లో తీవ్రమైన అంతర్గత గాయాలు ఉన్నాయని తేలడంతో.. మే 31, 2026 న నెడుమంగడ్ పోలీసులు నిందితుడు అష్కర్‌ను అరెస్ట్ చేశారు.

పసికందు శరీరంపై 50 గాయాలు.. సిగరెట్ కాలిన గుర్తులు!

50 injuries and cigarette burn marks identified on Babu’s body.

పోలీసుల కథనం ప్రకారం.. ఆ పసికందు శరీరంపై వివిధ కాలాలకు చెందిన దాదాపు 50 గాయాల గుర్తులు ఉన్నాయి. కొన్ని గాయాలు తాజావి కాగా, మరికొన్ని పాతవి. అంతటి చిన్నారి శరీరంపై సిగరెట్ పీకలతో కాల్చిన గుర్తులు కూడా ఉన్నాయని, అష్కర్ ఈ దారుణానికి ఒడిగట్టాడని పోలీసులు గుర్తించారు. అఖిల భర్త ఆమె కొడుకు పుట్టకముందే మరణించాడు. ఆ తర్వాత ఆమె 31 ఏళ్ల అష్కర్‌తో సహజీవనం (Live-in Relationship) ప్రారంభించింది. అప్పటినుంచి ఆ చిన్నారికి నరకం మొదలైంది. శుక్రవారం నాడు అష్కర్ ఆ బాబును పనవూరులోని ఒక ప్రైవేట్ ఆసుపత్రికి తీసుకువచ్చి, భోజనం చేస్తుండగా గొంతులో ఇరుక్కుపోయిందని అబద్ధం చెప్పాడు. పరిస్థితి విషమించడంతో ఎస్ఏటీ ఆసుపత్రికి తరలించగా.. అప్పటికే బాబు మరణించినట్లు వైద్యులు ప్రకటించారు. ఆ సమయంలో 24 ఏళ్ల తల్లి అఖిల డ్యాన్స్ ప్రోగ్రాం కోసం తమిళనాడు వెళ్లినట్లు తెలిసింది.

Nedumangad Child Abuse Case:ముందే ఫిర్యాదు చేసినా పట్టించుకోని పోలీసులు

ఈ మరణంపై బంధువులు మొదటి నుంచే అనుమానాలు వ్యక్తం చేసినప్పటికీ, మెడికల్ రిపోర్టులో అసలు నిజాలు బయటపడిన తర్వాతే పోలీసులు సీరియస్ దర్యాప్తు ప్రారంభించారు. అంతకుముందే బాబుపై దాడులు జరుగుతున్నాయనే అనుమానంతో అర్షిద్ తాతమ్మ, తాతయ్యలు పోలీసులను ఆశ్రయించినప్పటికీ, నాడు పోలీసులు ఆ ఫిర్యాదును నిర్లక్ష్యం చేసినట్లు ఇప్పుడు వెలుగులోకి వచ్చింది. ప్రస్తుతం నెడుమంగడ్ డీవైఎస్పీ నేతృత్వంలో దర్యాప్తు వేగంగా సాగుతోంది. బాబుపై జరుగుతున్న దాడుల గురించి తల్లి అఖిలకు ముందే తెలిసినప్పటికీ, ఆమె తన కొడుకును రక్షించుకోలేదని, పోలీసులకు కూడా సమాచారం ఇవ్వలేదని అధికారులు తెలిపారు. దీంతో ఈ కేసు ఛార్జ్‌షీట్‌లో ఆమె పేరును కూడా చేర్చే అవకాశం ఉంది.

మొదటి భార్యపై కూడా పాశవిక దాడి

నిందితుడు అష్కర్ అరెస్ట్ కావడంతో అతని పాత నేరాలు కూడా బయటకు వస్తున్నాయి. అష్కర్ మొదటి భార్య అమీనా కుటుంబ సభ్యులు మీడియాతో మాట్లాడుతూ.. అష్కర్‌కు అమీనాతో ఇంకా విడాకులు కాలేదని తెలిపారు. గతంలో ఆమెను కూడా అష్కర్ తీవ్రంగా హింసించాడని, తలను గోడకేసి కొట్టడమే కాకుండా ఫ్యాన్‌కు ఉరివేసి చంపేందుకు ప్రయత్నించాడని అమీనా తల్లి ఆవేదన వ్యక్తం చేసింది. ఆ దాడిలో స్పృహ కోల్పోయిన అమీనా దాదాపు ఏడాది పాటు మంచానికే పరిమితమైందని, ప్రస్తుతం మెడికల్ కాలేజీ ఆసుపత్రిలో చికిత్స పొందుతూ ఇటీవలే కోలుకుంటోందని చెప్పారు.

నిందితుడిపై తిరగబడ్డ స్థానికులు

ఈ పసివాడి హత్య ఉదంతం స్థానికంగా తీవ్ర ఆగ్రహాన్ని రేకెత్తించింది. సాక్ష్యాల సేకరణ కోసం నెడుమంగడ్ పోలీసులు నిందితుడు అష్కర్‌ను కరికుళిలోని అతని నివాసానికి తీసుకువచ్చినప్పుడు, అక్కడ గుమిగూడిన భారీ జనం నిందితుడిపై దాడికి ప్రయత్నించారు. దీంతో పోలీసులు జోక్యం చేసుకుని గుంపును అదుపు చేసి, నిందితుడిని సురక్షితంగా అక్కడి నుంచి తరలించారు.