Khairatabad Bypoll: తెలంగాణ రాజకీయాలు ప్రస్తుతం ఖైరతాబాద్ నియోజకవర్గ ఉప ఎన్నిక చుట్టూ వేగంగా తిరుగుతున్నాయి. దానం నాగేందర్ పార్టీ ఫిరాయింపుల కేసులో తెలంగాణ హైకోర్టు అనర్హత వేటు వేయడంతో అక్కడ ఉప ఎన్నిక అనివార్యంగా కనిపిస్తోంది.
ఈ తీర్పును సవాలు చేస్తూ దానం నాగేందర్ సుప్రీంకోర్టును ఆశ్రయించినప్పటికీ, హైకోర్టు తీర్పుకే ప్రాధాన్యత లభించే అవకాశం ఉందని న్యాయ నిపుణులు భావిస్తున్నారు. మరోవైపు త్వరలోనే గ్రేటర్ హైదరాబాద్ మున్సిపల్ కార్పొరేషన్ (GHMC) ఎన్నికలు కూడా సమీపిస్తుండటంతో, బీఆర్ఎస్ అధిష్టానం ఖైరతాబాద్‌పై ప్రత్యేక దృష్టి సారించింది.
Read Also : Indiramma Illu: లబ్ధిదారులకు అలాట్‌మెంట్ లెటర్లు.. నేటి నుంచే పంపిణీ!
Talasani’s son as the BRS candidate for the Khairatabad by-election?
Khairatabad Bypoll: బీఆర్ఎస్ రేసులో పలువురు నేతలు
ఖైరతాబాద్ ఉప ఎన్నికల్లో బీఆర్ఎస్ అభ్యర్థిత్వం కోసం తీవ్ర పోటీ నెలకొంది. పార్టీ నుంచి ప్రధానంగా:
- పి.జె.ఆర్ తనయుడు విష్ణువర్ధన్ రెడ్డి
- ఎమ్మెల్సీ దాసోజు శ్రవణ్
- మన్నె గోవర్ధన్ రెడ్డి
- మాజీ మంత్రి తలసాని శ్రీనివాస్ యాదవ్ తనయుడు సాయికిరణ్ యాదవ్
వీరి పేర్లు ప్రముఖంగా వినిపిస్తున్నప్పటికీ, బీఆర్ఎస్ అధినేత కేసీఆర్ మాత్రం తలసాని సాయికిరణ్యాదవ్‌ వైపే ఎక్కువ మొగ్గు చూపుతున్నట్లు పార్టీ వర్గాలు వెల్లడిస్తున్నాయి. ఈ విషయమై కేసీఆర్ స్వయంగా తలసాని శ్రీనివాస్ యాదవ్‌తో ఫోన్‌లో మాట్లాడి ప్రాథమిక చర్చలు జరిపినట్లు తెలుస్తోంది.
ఖైరతాబాద్‌లో సాయికిరణ్ బలబలాలు
తలసాని శ్రీనివాస్ యాదవ్‌కు గ్రేటర్ హైదరాబాద్‌తో పాటు ఖైరతాబాద్ నియోజకవర్గంలోనూ బలమైన పట్టు ఉంది. గతంలో మంత్రిగా పనిచేసిన సమయంలో ఈ ప్రాంతంలో ఆయన చేపట్టిన అభివృద్ధి కార్యక్రమాలు పార్టీకి కలసివస్తాయని కేసీఆర్ అంచనా వేస్తున్నారు.
ఖైరతాబాద్‌లో తలసాని సామాజిక వర్గానికి చెందిన ఓటర్లతో పాటు ఇతర బిసి (BC) సామాజిక వర్గాల ఓటర్లు అధిక సంఖ్యలో ఉన్నారు. వీరిలో ఎక్కువ భాగం తలసాని కుటుంబానికి అనుకూలంగా ఉంటారని బీఆర్ఎస్ భావిస్తోంది.
తెలంగాణ ఆవిర్భావం తర్వాత జరిగిన తొలి లోక్‌సభ ఎన్నికల్లో సాయికిరణ్ సికింద్రాబాద్ పార్లమెంట్ స్థానం నుండి పోటీ చేశారు. అనంతరం గత ఎన్నికల్లో కూడా సికింద్రాబాద్ స్థానాన్ని ఆశించినప్పటికీ చివరి నిమిషంలో పద్మారావు గౌడ్‌కు అవకాశం లభించింది. ఇప్పుడు ఖైరతాబాద్ ఉప ఎన్నిక ద్వారా ఆయనకు అసెంబ్లీలో అడుగుపెట్టే అవకాశం ఇవ్వాలని అధిష్టానం భావిస్తోంది.
కేటీఆర్‌కు కీలక దిశా నిర్దేశం
ఖైరతాబాద్ ఉప ఎన్నికను ప్రతిష్టాత్మకంగా తీసుకున్న కేసీఆర్, ఎన్నికల వ్యూహరచన మరియు సమన్వయ బాధ్యతలను కార్యనిర్వాహక అధ్యక్షుడు కేటీఆర్‌కు అప్పగించారు. సుప్రీంకోర్టులో దానం నాగేందర్ పిటిషన్‌పై వచ్చే స్పష్టత ఆధారంగా బీఆర్ఎస్ తమ అభ్యర్థిని అధికారికంగా ప్రకటించేందుకు రంగం సిద్ధం చేసుకుంటోంది.