మమతకు భారీ షాక్.. బెంగాల్‌లో రెబెల్స్ కొత్త ఎత్తుగడ

Ritabrata Banerjee : పశ్చిమ బెంగాల్ రాజకీయాల్లో అనూహ్య పరిణామాలు చోటుచేసుకుంటున్నాయి. తృణమూల్ కాంగ్రెస్‌లో అంతర్గత విభేదాలు కొత్త మలుపు తిరిగినట్లు కనిపిస్తోంది.

పార్టీ నుంచి బహిష్కరణకు గురైన రితబ్రత బెనర్జీ అసెంబ్లీలో కొత్త ప్రతిపక్ష నేతగా ఎంపికైనట్లు సమాచారం వెలువడింది.

రితబ్రతకు ఎమ్మెల్యేల మద్దతు

ఇటీవలి రాజకీయ పరిణామాల మధ్య 80 మంది టీఎంసీ ఎమ్మెల్యేలలో 58 మంది రితబ్రత బెనర్జీకి మద్దతు ప్రకటించినట్లు తెలుస్తోంది. తమ మద్దతును తెలియజేస్తూ ఎమ్మెల్యేల సంతకాలతో కూడిన లేఖను స్పీకర్‌కు సమర్పించినట్లు సమాచారం. ఈ పరిణామం బెంగాల్ రాజకీయాల్లో చర్చనీయాంశంగా మారింది.

అసెంబ్లీలో కొత్త సమీకరణాలు

స్పీకర్‌కు సమర్పించిన లేఖ ఆధారంగా అసెంబ్లీలో కొత్త రాజకీయ సమీకరణాలు ఏర్పడినట్లు చెబుతున్నారు. రితబ్రత బెనర్జీ తన శాసనసభా పక్షానికి సంబంధించిన కీలక పదవులను కూడా ప్రకటించారు. అఖ్రుజ్జమాన్‌ను చీఫ్ విప్‌గా, పలువురు సీనియర్ ఎమ్మెల్యేలను డిప్యూటీ లీడర్లుగా నియమించినట్లు వెల్లడించారు.

Ritabrata Banerjee

సంతకాల వివాదం దర్యాప్తు

కొద్ది రోజుల క్రితం ప్రతిపక్ష నేత ఎంపికకు సంబంధించిన లేఖలో సంతకాల ఫోర్జరీ జరిగిందంటూ రితబ్రత బెనర్జీ, సందీపన్ సాహా ఫిర్యాదు చేసిన విషయం రాజకీయంగా ప్రాధాన్యత సంతరించుకుంది. ఈ వ్యవహారంపై సీఐడీ విచారణ ప్రారంభించింది. అనంతరం టీఎంసీ అధిష్టానం రితబ్రత, సందీపన్‌లను పార్టీ నుంచి బహిష్కరించింది. అయినప్పటికీ మమతా బెనర్జీ తమకు మార్గదర్శకత్వం చేయాలని రితబ్రత విజ్ఞప్తి చేయడం ఆసక్తికరంగా మారింది.