FIFA World Cup 2026:ఫీఫా ప్రపంచ కప్ 2026 వార్మప్ మ్యాచ్‌లు టోర్నమెంట్‌కు ముందు ఆసక్తిని పెంచుతున్నాయి. మెక్సికో సొంత మైదానంలో సెర్బియా జట్టుతో తలపడింది.

ఆట ప్రారంభంలోనే సెర్బియా ఆటగాడు పెటార్ స్టానిక్ 19వ నిమిషంలో గోల్ కొట్టి మెక్సికోను ఒత్తిడిలో పడేశాడు. అయితే ఆతిథ్య జట్టు ఏమాత్రం కుంగిపోకుండా వ్యూహాత్మకంగా ఆడింది. 34వ నిమిషంలో జోహాన్ వాస్క్వెజ్ హెడర్ ద్వారా గోల్ చేసి స్కోరును 1-1 తో సమం చేశాడు. ఆ తర్వాత సెర్బియా చేసిన పొరపాటు మెక్సికోకు కలిసి వచ్చింది. మొదటి హాఫ్ ముగిసే సమయానికి సెర్బియా సెల్ఫ్ గోల్ చేయడంతో మెక్సికో 2-1 ఆధిక్యంలోకి దూసుకెళ్లింది. ఈ కీలక మలుపు మెక్సికో ఆటగాళ్లలో మరింత ఉత్సాహాన్ని నింపింది. సొంత గడ్డపై తమ అభిమానుల మధ్య మెక్సికో జట్టు అద్భుతమైన సమన్వయంతో ప్రత్యర్థిపై విరుచుకుపడింది.

Read also: KS Bharat Retirement: అంతర్జాతీయ క్రికెట్‌కు రిటైర్మెంట్ ప్రకటించిన తెలుగు ప్లేయర్ శ్రీకర్ భరత్

Mexico vs Serbia FIFA World Cup 2026 warmup match

రెండో అర్ధభాగంలో గోల్స్ వర్షం

విరామం తర్వాత మెక్సికో తన పూర్తి స్థాయి ఆటను ప్రదర్శించింది. 57వ నిమిషంలో రౌల్ జిమెనెజ్ మెరుపు వేగంతో గోల్ చేసి ఆధిక్యాన్ని 3-1 కి పెంచాడు. ఈ దశలో సెర్బియా డిఫెన్స్ విఫలమవడంతో మెక్సికో సునాయాసంగా బంతిని పాస్ చేస్తూ ముందుకు సాగింది. 72వ నిమిషంలో సెర్బియా మరో సెల్ఫ్ గోల్ చేయడం మెక్సికోకు కలిసొచ్చింది. దీంతో ఆతిథ్య జట్టు 4-1 తో విజయాన్ని ఖరారు చేసుకున్నంత పని చేసింది. మ్యాచ్ ముగింపు దశలో లూయిస్ చావెజ్ చేసిన లాంగ్ రేంజ్ గోల్ స్టేడియాన్ని హోరెత్తించింది. మెక్సికో జట్టు క్రీడాకారులు వేగంగా కదులుతూ సెర్బియాకు ఏమాత్రం అవకాశం ఇవ్వలేదు. ఈ గెలుపు మెక్సికో జట్టు ఆత్మవిశ్వాసాన్ని రెట్టింపు చేసింది. జేవియర్ అగ్యిరే శిక్షణలో మెక్సికో జట్టు ప్రపంచ కప్ కోసం సిద్ధంగా ఉన్నట్లు స్పష్టంగా కనిపిస్తోంది.