ఆరోగ్యకరమైన జీవనశైలిలో సరైన ఆహారం, వ్యాయామం ఎంత ముఖ్యమో, నిద్ర కూడా అంతకంటే ఎక్కువే ప్రాధాన్యత కలిగి ఉంటుంది. నేటి ఉరుకుల పరుగుల జీవితంలో చాలామంది నిద్రను నిర్లక్ష్యం చేస్తూ అనేక అనారోగ్య సమస్యలను కొనితెచ్చుకుంటున్నారు.

ఈ నేపథ్యంలో నిద్ర విషయంలో మనం చేసే పొరపాట్లు, పాటించాల్సిన నియమాలపై వైద్య నిపుణులు పలు సలహాలు ఇస్తున్నారు. చాలామంది ఎన్ని గంటలు నిద్రపోయామనే దానిపైనే దృష్టి పెడతారు కానీ, ఏ సమయానికి పడుకున్నామనే విషయాన్ని విస్మరిస్తారు. వైద్య నిపుణుల ప్రకారం, రోజూ ఒకే సమయానికి నిద్రపోవడం మరియు ఒకే సమయానికి మేల్కోవడం అనేది మన శరీరంలోని ‘బయోలాజికల్ క్లాక్’ (Circadian Rhythm)ను క్రమబద్ధీకరిస్తుంది. సాధారణంగా ఒక ఆరోగ్యవంతుడైన వ్యక్తికి 7 నుంచి 9 గంటల గాఢ నిద్ర అవసరం. అయితే, ప్రతిరోజూ నిద్రపోయే వేళలు మార్చడం వల్ల మెదడు తన పనితీరును మందగింపజేస్తుంది. దీనివల్ల ఏకాగ్రత తగ్గడం, జ్ఞాపకశక్తి లోపించడం వంటి సమస్యలు తలెత్తుతాయి.

Read Also : రొమ్ము క్యాన్సర్ మహిళలకే కాదు.. మగవారికీ కూడా! ఈ మార్పులు గమనించారా?

వీకెండ్ నిద్రతో జాగ్రత్త.. స్లీప్ డెట్ అపోహ మాత్రమే!

వారమంతా తక్కువ నిద్రపోయి, వారాంతాల్లో (వీకెండ్స్‌లో) ఎక్కువ సేపు పడుకోవడం ద్వారా ఆ లోటును భర్తీ చేయవచ్చని చాలామంది భావిస్తారు. కానీ, ఇది శరీరానికి మేలు చేయడం కంటే కీడే ఎక్కువ చేస్తుందని నిపుణులు హెచ్చరిస్తున్నారు. ఇలా వారాంతాల్లో ఎక్కువ సేపు పడుకోవడం వల్ల మీ సహజమైన స్లీప్ సైకిల్ దెబ్బతింటుంది. దీనివల్ల సోమవారం ఉదయం మళ్లీ పనుల్లో నిమగ్నమవ్వడం శరీరానికి కష్టతరమవుతుంది. అందుకే, సెలవు దినాల్లో కూడా సాధారణ రోజుల్లో లాగే ఒకే రకమైన నిద్ర అలవాట్లను పాటించడం మెదడు ఆరోగ్యానికి మరియు రోజంతా ఉత్సాహంగా ఉండటానికి తోడ్పడుతుంది.