మూడు నెలల కనిష్ఠానికి క్రూడాయిల్ ధర

Crude Oil Price : అంతర్జాతీయ మార్కెట్లో ముడిచమురు (Crude Oil) ధరలు భారీగా క్షీణించాయి. అమెరికా, ఇరాన్ దేశాల మధ్య కుదిరిన ప్రాథమిక శాంతి ఒప్పందం (Peace Deal) మరియు వ్యూహాత్మక జలసంధి 'హార్ముజ్' (Strait of Hormuz) తిరిగి ఓపెన్ కానుండటంతో అంతర్జాతీయంగా చమురు సరఫరా ఆటంకాలు తొలగిపోతాయనే అంచనాలు పెరిగాయి.

దీని ప్రభావంతో గ్లోబల్ బెంచ్‌మార్క్ అయిన బ్రెంట్ క్రూడాయిల్ (Brent Crude) ధర ఏకంగా మూడు నెలల కనిష్ఠ స్థాయికి పడిపోయింది. ప్రస్తుతం అంతర్జాతీయ మార్కెట్లో బ్యారెల్ బ్రెంట్ క్రూడాయిల్ ధర 79 డాలర్ల వద్ద కొనసాగుతోంది. కేవలం గత నాలుగు ట్రేడింగ్ సెషన్లలోనే క్రూడాయిల్ ధర ఏకంగా 16 శాతం మేర పతనం కావడం గమనార్హం. కాగా, ప్రస్తుత ఏడాదిలో చమురు ధరల్లో నమోదైన అత్యంత సుదీర్ఘమైన మరియు పెద్ద పతన సెషన్ (Longest Drop Session) ఇదే కావడం అంతర్జాతీయ మార్కెట్ వర్గాల్లో హాట్ టాపిక్‌గా మారింది.

హార్ముజ్ దిగ్బంధం వీడటమే కారణం: నాడు 126 డాలర్లు.. నేడు ఊరట!

గడిచిన కొన్ని నెలలుగా అంతర్జాతీయ ఇంధన మార్కెట్‌ను తీవ్ర ఆందోళనకు గురిచేసిన భౌగోళిక రాజకీయ ఉద్రిక్తతలు ఇప్పుడు శాంతి ఒప్పందంతో చల్లబడ్డాయి. సుమారు రెండు నెలల క్రితం, అమెరికా (US) ఇరాన్‌పై ఆంక్షల్లో భాగంగా హార్ముజ్ జలసంధిని దిగ్బంధించిన సమయంలో ప్రపంచవ్యాప్తంగా చమురు కొరత ఏర్పడింది. ఆ సమయంలో బ్రెంట్ క్రూడాయిల్ ధర ఏకంగా 126 డాలర్లకు ఎగబాకింది. గత నాలుగేళ్ల కాలంలో ఇదే అత్యధిక రికార్డు ధర కావడం విశేషం. ప్రపంచవ్యాప్తంగా సముద్ర మార్గం ద్వారా రవాణా అయ్యే ముడిచమురులో దాదాపు 20 శాతం వాటా ఈ హార్ముజ్ జలసంధి ద్వారానే సాగుతుంది. ఇప్పుడు అమెరికా నావికా దళాల దిగ్బంధనం తొలగిపోతుండటం, ఇరాన్ నుంచి ఎగుమతులు పెరిగే అవకాశం ఉండటంతో మార్కెట్ మునుపటి సాధారణ స్థితికి చేరుకుంటోంది. ఈ ధరల తగ్గుదల భారతదేశం వంటి చమురు దిగుమతి దేశాలకు పెద్ద ఊరటనిచ్చే అంశం.