ఐపీఎల్‌లో 'మిస్టరీ స్పిన్నర్'గా పేరుగాంచిన సునీల్ నరైన్ తాజాగా 200 వికెట్ల మైలురాయిని చేరుకుని సెన్సేషనల్ రికార్డు సృష్టించారు. ఐపీఎల్ చరిత్రలో ఇప్పటివరకు యుజ్వేంద్ర చాహల్, భువనేశ్వర్ కుమార్ వంటి దిగ్గజ బౌలర్లు 200 వికెట్లు తీసినప్పటికీ, వారు కెరీర్ మొత్తంలో వేర్వేరు జట్లకు ప్రాతినిధ్యం వహించారు.

కానీ, నరైన్ మాత్రం కేవలం కోల్‌కతా నైట్ రైడర్స్ (KKR) తరపున ఆడుతూనే ఈ ఘనత సాధించడం విశేషం. ఐపీఎల్‌లో ఒకే ఫ్రాంచైజీ తరపున 200 వికెట్లు తీసిన ఏకైక ప్లేయర్‌గా ఆయన చరిత్ర సృష్టించారు.

Read Also : సన్‎రైజర్స్ కు షాక్.. పవర్‌ప్లేలోనే అభిషేక్ శర్మ అవుట్

కేకేఆర్ నా జీవితాన్ని మార్చేసింది

ఈ అరుదైన ఘనతపై నరైన్ భావోద్వేగంగా స్పందించారు. “ఈ రికార్డు సాధించడం నాకు ఎంతో గర్వకారణం. కేకేఆర్ జట్టు నా జీవితాన్ని పూర్తిగా మార్చేసింది. 2012లో ఈ జట్టులో చేరినప్పటి నుండి నాకు లభిస్తున్న మద్దతు వెలకట్టలేనిది. ఈ జెర్సీ నా గుండెకు ఎప్పటికీ ప్రత్యేకంగా ఉంటుంది” అని ఆయన పేర్కొన్నారు. కేవలం బౌలింగ్‌లోనే కాకుండా, ఓపెనర్‌గా వచ్చి మెరుపు ఇన్నింగ్స్ ఆడటంలోనూ నరైన్ జట్టుకు వెన్నెముకగా నిలుస్తున్నారు. మైదానంలో ఎంతటి ఒత్తిడి ఉన్నా ప్రశాంతంగా కనిపిస్తూ వికెట్లు తీయడం ఆయన ప్రత్యేకత.

మూడు కప్పుల ప్రయాణంలో కీలక పాత్ర

2012లో కేకేఆర్ జట్టులో అడుగుపెట్టిన నాటి నుండి నేటి వరకు నరైన్ ఆ జట్టులో విడదీయలేని భాగమయ్యారు. కేకేఆర్ సాధించిన మూడు ఐపీఎల్ టైటిల్స్ (2012, 2014, 2024) వెనుక నరైన్ శ్రమ ఎంతగానో ఉంది. పవర్ ప్లేలో పరుగులు నియంత్రించాలన్నా, డెత్ ఓవర్లలో కీలక వికెట్లు తీయాలన్నా కెప్టెన్లకు నరైన్ మొదటి ఛాయిస్‌గా నిలుస్తున్నారు. దశాబ్ద కాలానికి పైగా ఒకే జట్టుతో అనుబంధాన్ని కొనసాగిస్తూ, ప్రతీ సీజన్‌లో తన బౌలింగ్‌ను మెరుగుపరుచుకుంటూ ఈ స్థాయికి చేరడం యువ క్రికెటర్లకు ఒక గొప్ప ప్రేరణ.