ఒకే కుటుంబంలో ఏడుగురు మృతి.!

Delhi Hotel Fire accident : దేశ రాజధాని ఢిల్లీలో చోటుచేసుకున్న ఒక భయంకరమైన అగ్నిప్రమాదం ఒకే కుటుంబానికి చెందిన ఏడుగురిని పొట్టనబెట్టుకుని, అంతులేని విషాదాన్ని మిగిల్చింది.

గురుగ్రామ్‌కు చెందిన వివేక్ అగర్వాల్ తన తండ్రి రాధేశ్యామన్ అనారోగ్యానికి గురికావడంతో చికిత్స నిమిత్తం ఢిల్లీలోని మ్యాక్స్ ఆసుపత్రిలో చేర్పించారు. తండ్రిని ఆసుపత్రిలో చేర్చిన అనంతరం, వివేక్ తన కుటుంబ సభ్యులతో కలిసి స్థానిక ఒక హోటల్/రెస్టారెంట్‌లో బస చేశారు. అయితే, ఊహించని విధంగా అర్ధరాత్రి వేళ ఆ భవనంలో భారీ అగ్నిప్రమాదం సంభవించింది. ప్రమాదం జరిగిన సమయంలో గాఢ నిద్రలో ఉన్న కుటుంబ సభ్యులు బయటకు తప్పించుకునే లోపే మంటలు వేగంగా వ్యాపించడంతో అంతా అక్కడికక్కడే సజీవదహనమయ్యారు.

Delhi Hotel Fire accident

చికిత్స పొందుతున్న వృద్ధుడే ఏకైక వారసుడు.. శోకసంద్రంలో బంధువులు

ఈ ఘోర ప్రమాదంలో వివేక్ అగర్వాల్‌తో పాటు ఆయన భార్య తర్జిని, కుమార్తెలు జివిసా, వరియా, తల్లి లత, అలాగే అత్తామామలైన అశోక్, కమలలు ప్రాణాలు కోల్పోయారు. ఆసుపత్రిలో మృత్యువుతో పోరాడుతున్న వృద్ధుడు రాధేశ్యామన్‌ను కాపాడుకోవడానికి వచ్చిన ఆ కుటుంబం, తామే అనంత లోకాలకు వెళ్ళిపోవడం స్థానికులను తీవ్రంగా కలచివేసింది. ప్రస్తుతం ఆ కుటుంబంలో ఆసుపత్రి బెడ్‌పై ఉన్న రాధేశ్యామన్ ఒక్కరే ప్రాణాలతో మిగిలారు. కంటికి రెప్పలా చూసుకోవాల్సిన కొడుకు, కోడలు, మనవరాలు, భార్య అందరూ ఒకేసారి మరణించారనే చేదు నిజాన్ని ఆయనకు ఎలా చెప్పాలో తెలియక బంధువులు శోకసంద్రంలో మునిగిపోయారు. షార్ట్ సర్క్యూట్ కారణంగానే ఈ ప్రమాదం జరిగి ఉండవచ్చని పోలీసులు ప్రాథమికంగా అనుమానిస్తున్నారు.