పాకిస్థాన్‌కు భారత సైన్యం గట్టి హెచ్చరికలు జారీ చేసింది. ఉగ్రవాదాన్ని పెంచి పోషించడం, భారత్‌పైకి ఉగ్రమూకలను ఉసిగొల్పడం తక్షణమే మానకపోతే ఆ దేశం తీవ్ర పరిణామాలు ఎదుర్కోవాల్సి వస్తుందని భారత ఆర్మీ చీఫ్ జనరల్ ఉపేంద్ర ద్వివేది తీవ్రస్థాయిలో హెచ్చరించారు.

‘ఆపరేషన్ సిందూర్’ వార్షికోత్సవం సందర్భంగా ఆయన ప్రసంగిస్తూ, పాక్‌ ఉనికిని ప్రశ్నించేలా సంచలన వ్యాఖ్యలు చేశారు. “మీరు ప్రపంచ పటంలో (మ్యాప్‌లో) ఒక దేశంగా కొనసాగాలనుకుంటున్నారా? లేక చరిత్ర పుటల్లో కలిసిపోవాలనుకుంటున్నారా?” అంటూ ఆయన పాకిస్థాన్‌కు సూటిగా వార్నింగ్ ఇచ్చారు. ఈ వ్యాఖ్యలు ఇప్పుడు అంతర్జాతీయంగా మరియు రక్షణ రంగంలో తీవ్ర చర్చనీయాంశంగా మారాయి.

Read Also : ట్రాక్‌పై దూసుకొచ్చిన రైలు..ప్రాణాలకు తెగించి ఇద్దరు పిల్లలను కాపాడిన వీరమాత!

పహల్గామ్ దాడికి ప్రతీకారం

గతేడాది జమ్మూ కాశ్మీర్‌లోని పహల్గామ్ ప్రాంతంలో జరిగిన ఉగ్రదాడిని భారత సైన్యం తేలికగా తీసుకోలేదు. ఆ ఉగ్ర చర్యకు ప్రతికారం తీర్చుకునేందుకు గట్టి వ్యూహాన్ని రచించింది. ఈ క్రమంలోనే ఈ ఏడాది మే 7వ తేదీన భారత సైన్యం పాకిస్థాన్ ఆక్రమిత ప్రాంతంలోని ఉగ్రవాద శిబిరాలపై మెరుపు దాడికి దిగింది. మన సైనికులు ఉగ్రవాద స్థావరాలను లక్ష్యంగా చేసుకుని విరుచుకుపడటంతో పాక్ ఉగ్రవాద నెట్‌వర్క్‌ కుప్పకూలింది. భారత ఆర్మీ దెబ్బకు కోలుకోలేని స్థితికి చేరిన పాకిస్థాన్ ప్రభుత్వం, మే 10వ తేదీన కాల్పుల విరమణ (సీజ్‌ఫైర్) ప్రతిపాదనతో భారత దేశం ముందు మోకరిల్లి కాళ్లబేరానికి వచ్చింది.

తోకముడిచిన పాక్.. మారకపోతే మళ్లీ దెబ్బే!

భారత సైన్యం సృష్టించిన బీభత్సానికి భయపడిపోయిన పాక్ ప్రభుత్వం, ప్రస్తుతానికి వెనక్కి తగ్గినప్పటికీ వారి బుద్ధి మారేలా కనిపించడం లేదు. ఈ నేపథ్యంలోనే ఆర్మీ చీఫ్ జనరల్ ఉపేంద్ర ద్వివేది చేసిన వ్యాఖ్యలు పాకిస్థాన్‌కు గట్టి సంకేతాలను పంపాయి. సరిహద్దుల్లో శాంతిని కోరుకుంటే భారత్ సహకరిస్తుందని, అలా కాకుండా ఉగ్రవాదాన్ని ప్రోత్సహిస్తూ ఉంటే మాత్రం మున్ముందు అంతకంటే ఘోరమైన దాడులు ఎదుర్కోవాల్సి వస్తుందని స్పష్టం చేశారు. ఈ కథనం ప్రకారం.. భారత రక్షణ విభాగం శత్రుదేశాల కుతంత్రాలను తిప్పికొట్టడమే కాకుండా, అవసరమైతే శత్రువుల గుండెల్లోకి చొరబడి కొట్టేందుకు కూడా వెనుకాడబోదని మరోసారి నిరూపితమైంది.