Palamuru Rangareddy Project: పాలమూరు-రంగారెడ్డి ఎత్తిపోతల పథకంపై వస్తున్న ఊహాగానాలకు తెరదించుతూ రాష్ట్ర ప్రభుత్వం కీలక ప్రకటన చేసింది. ఈ ప్రతిష్టాత్మక ప్రాజెక్టును ఎట్టి పరిస్థితుల్లోనూ ఆపే ప్రసక్తి లేదని, మిగిలిన నిధులను కూడా తక్షణమే విడుదల చేస్తామని రాష్ట్ర భారీ నీటిపారుదల శాఖ మంత్రి నలమడ ఉత్తమ్‌కుమార్ రెడ్డి స్పష్టం చేశారు.

సచివాలయంలోని తన కార్యాలయంలో ఉమ్మడి మహబూబ్‌నగర్ జిల్లాకు చెందిన మంత్రులు, ఎమ్మెల్యేలతో మంత్రి ఉత్తమ్‌కుమార్ రెడ్డి మంగళవారం (మే 19, 2026) నాడు ఒక ఉన్నత స్థాయి ప్రత్యేక సమావేశం నిర్వహించారు. ఉమ్మడి జిల్లా ప్రజాప్రతినిధులు ప్రాజెక్టు చరిత్రాత్మక ప్రాధాన్యతను వివరించి, దీని ద్వారానే జిల్లాలో సాగు, తాగునీటి సమస్యలు పూర్తిగా పరిష్కారమవుతాయని మంత్రి దృష్టికి తీసుకెళ్లారు.

నిధుల విడుదల.. పనుల వేగవంతానికి హామీ

మహబూబ్‌నగర్ జిల్లా ప్రజాప్రతినిధుల విజ్ఞప్తిపై మంత్రి ఉత్తమ్‌కుమార్ రెడ్డి సానుకూలంగా స్పందించారు. పాలమూరు ప్రాంత అభివృద్ధికి ఈ ప్రాజెక్టు అత్యంత కీలకమని ఆయన పేర్కొన్నారు. ప్రాజెక్టు పనులను మరింత వేగవంతం చేయడంతో పాటు, దీనికి అవసరమైన మిగిలిన నిధులను విడుదల చేయడానికి ప్రభుత్వం సిద్ధంగా ఉందని మంత్రి స్పష్టం చేశారు. రైతులకు సకాలంలో సాగునీటి సౌకర్యం కల్పించడమే తమ ప్రజా ప్రభుత్వ ముఖ్య లక్ష్యమని ఆయన వివరించారు.

భూసేకరణ ప్రక్రియపై అధికారులకు కీలక ఆదేశాలు

ప్రాజెక్టు పరిధిలో ఇంకా పెండింగ్‌లో ఉన్న భూసేకరణ (Land Acquisition) ప్రక్రియను యుద్ధప్రాతిపదికన పూర్తి చేయాలని సంబంధిత అధికారులను మంత్రి ఆదేశించారు. భూసేకరణ విషయంలో రైతులకు ఎలాంటి ఇబ్బందులు, ఆటంకాలు లేకుండా పారదర్శకంగా చర్యలు తీసుకోవాలని సూచించారు. ఈ ప్రాజెక్టు పనుల పురోగతిని తానే స్వయంగా ఎప్పటికప్పుడు సమగ్ర సమీక్షల ద్వారా పర్యవేక్షిస్తానని మంత్రి తెలిపారు.

Palamuru Rangareddy Project: పదిహేను రోజుల్లోగా పాలమూరు పర్యటన

పాలమూరు-రంగారెడ్డి ప్రాజెక్టు క్షేత్రస్థాయి పరిస్థితులను, పనుల వేగాన్ని స్వయంగా పరిశీలించేందుకు రాబోయే పదిహేను రోజుల్లోగా ఉమ్మడి మహబూబ్‌నగర్ జిల్లాలో పర్యటిస్తానని మంత్రి ఉత్తమ్‌కుమార్ రెడ్డి ఈ సందర్భంగా హామీ ఇచ్చారు. ఈ సమావేశంలో జిల్లా మంత్రులు జూపల్లి కృష్ణారావు, వాకిటి శ్రీహరి, ప్రభుత్వ విప్ యెన్నం శ్రీనివాస్ రెడ్డితో పాటు ఎమ్మెల్యేలు జి. మధుసూదన్ రెడ్డి, రాజేష్ రెడ్డి, వీర్లపల్లి శంకర్, డాక్టర్ వంశీకృష్ణ, కసిరెడ్డి నారాయణ రెడ్డి తదితరులు పాల్గొన్నారు.