పశ్చిమాసియా యుద్ధం.. భారత్‌లో లాక్‌డౌన్? క్లారిటీ ఇచ్చిన కేంద్ర మంత్రి

Hardeep Singh Puri: పశ్చిమాసియాలో కొనసాగుతున్న యుద్ధ వాతావరణం కారణంగా అంతర్జాతీయంగా ఇంధన సంక్షోభం ఏర్పడవచ్చనే ఆందోళనలు వ్యక్తమవుతున్నాయి. ఈ నేపథ్యంలో సరుకుల ధరలు విపరీతంగా పెరుగుతాయనే భయంతో సామాన్య ప్రజలు నిత్యావసర వస్తువులను భారీగా కొనుగోలు చేసి నిల్వ చేసుకుంటున్నారు.

ముఖ్యంగా వంట నూనెలు, పప్పు ధాన్యాలతో పాటు పెట్రోల్, డీజిల్ కోసం బంకుల వద్ద జనం క్యూ కడుతున్నారు. అయితే, దేశంలో ఆహార పదార్థాలు, ఎరువులు మరియు ఇంధన నిల్వలు పుష్కలంగా ఉన్నాయని, ప్రజలు అనవసరంగా భయాందోళనలకు గురికావద్దని కేంద్ర ప్రభుత్వం స్పష్టం చేస్తోంది.

Hardeep Singh Puri: There are adequate stocks of food, fuel, and fertilizers in the country.

సోషల్ మీడియాలో వచ్చే తప్పుడు వార్తలను నమ్మి వస్తువులను నిల్వ చేయవద్దు

యుద్ధం కారణంగా దేశవ్యాప్తంగా మళ్లీ లాక్‌డౌన్ విధించబోతున్నారంటూ సోషల్ మీడియాలో వస్తున్న వార్తలపై కేంద్ర పెట్రోలియం శాఖ మంత్రి హర్దీప్ సింగ్ పూరి క్లారిటీ ఇచ్చారు. అటువంటి ప్రతిపాదనలేవీ ప్రభుత్వం వద్ద లేవని, అవన్నీ కేవలం నిరాధారమైన వదంతులేనని ఆయన కొట్టిపారేశారు. బాధ్యతారాహిత్యంగా ఇటువంటి పుకార్లను వ్యాప్తి చేసి ప్రజల్లో గందరగోళం సృష్టించవద్దని ఆయన హెచ్చరించారు. ఇలాంటి క్లిష్ట సమయాల్లో ప్రజలు సంయమనంతో, ఐక్యంగా ఉండాలని ఆయన కోరారు.

Hardeep Singh Puri: నిత్యావసరాల కోసం కంగారు పడవద్దన్న ప్రభుత్వం

పశ్చిమాసియా సంఘర్షణ వల్ల తలెత్తే ఎలాంటి సవాళ్లనైనా ఎదుర్కోవడానికి భారత్ సిద్ధంగా ఉందని ప్రభుత్వం భరోసా ఇచ్చింది. అంతర్జాతీయ మార్కెట్‌లో అనిశ్చితి ఉన్నప్పటికీ, దేశంలో క్రూడ్ ఆయిల్, ఎల్‌పీజీ మరియు ఇతర ఇంధనాల సరఫరాకు ఎటువంటి ఆటంకం లేదని పార్లమెంటులోనూ వెల్లడించింది. మన దేశ రిఫైనరీలు పూర్తి సామర్థ్యంతో పనిచేస్తున్నాయని, ప్రత్యామ్నాయ మార్గాల ద్వారా ఇంధన దిగుమతులు నిరంతరాయంగా కొనసాగుతున్నాయని కేంద్రం హామీ ఇచ్చింది. ప్రజలకు విద్యుత్, గ్యాస్ మరియు ఇతర నిత్యావసరాల సరఫరాలో ఎటువంటి కోత ఉండదని ప్రభుత్వం స్పష్టం చేసింది.