Satvik Sairaj Comments: భారత బ్యాడ్మింటన్ స్టార్ ద్వయం సాత్విక్ సాయిరాజ్ - చిరాగ్ శెట్టి మనసు గాయపడింది. థామస్ కప్‌లో దేశానికి కీర్తి ప్రతిష్టలు తెచ్చినప్పటికీ, స్వదేశంలో ఎదురైన చేదు అనుభవాలను తలచుకుని వారు తీవ్ర అసహనం వ్యక్తం చేశారు.

స్పోర్ట్స్ అథారిటీ ఆఫ్ ఇండియా (SAI) సమావేశంలో సాత్విక్ పంచుకున్న విషయాలు విస్మయానికి గురిచేస్తున్నాయి.

Read Also :IPL 2026 Playoffs Schedule: బెంగళూరుకు దక్కని ఫైనల్ ఛాన్స్.. వేదికగా మళ్ళీ అహ్మదాబాద్!

ఎయిర్‌పోర్ట్‌లో పలకరించే నాథుడే లేడు

విదేశీ గడ్డపై త్రివర్ణ పతాకాన్ని ఎగురవేసి వచ్చిన తమకు విమానాశ్రయంలో కనీస గౌరవం దక్కలేదని సాత్విక్ ఆవేదన వ్యక్తం చేశారు.

• గుర్తించని జనం: “మేము థామస్ కప్ జెర్సీలు వేసుకుని వచ్చినా ఎవరూ మమ్మల్ని గుర్తుపట్టలేదు. అందరూ ఐపీఎల్, రాజకీయాల్లో మునిగిపోయారు. కనీసం ‘బాగా ఆడారు’ అని చెప్పే ఒక్క గొంతు కూడా వినిపించలేదు” అని ఆయన వాపోయారు.
• క్యాబ్‌ల కోసం నిరీక్షణ: ప్రపంచ స్థాయి ఆటగాళ్లయిన హెచ్.ఎస్. ప్రణయ్, కిదాంబి శ్రీకాంత్ వంటి వారు ఎయిర్‌పోర్ట్ బయట సామాన్యుల్లా క్యాబ్‌ల కోసం వేచి చూడటం చూసి గుండె తరుక్కుపోయిందని సాత్విక్ అన్నారు.

Satvik Sairaj Comments: పిల్లలను ఆటకు దూరంగా ఉంచుతా..

ఈ అవమానాలు భరించలేకే భవిష్యత్తులో తన పిల్లలను బ్యాడ్మింటన్ వైపు రానివ్వనని సాత్విక్ సంచలన నిర్ణయం తీసుకున్నారు. “మాకు కోట్లు అవసరం లేదు, కనీసం ఒక చిన్న పిల్లోడు వచ్చి మీ ఆట బాగుందని చెబితే చాలు. కానీ మన దేశంలో క్రికెట్ తప్ప ఇతర క్రీడలకు ఆ సంస్కృతి లేదు. అందుకే నా పిల్లల్ని ఈ ఆటకు దూరంగా ఉంచుతాను. ఈ మానసిక ఒత్తిడిని వారు తట్టుకోలేరు.” – సాత్విక్ సాయిరాజ్

సోషల్ మీడియా ట్రోలింగ్‌పై ఆగ్రహం

గెలిచినప్పుడు పట్టించుకోని వారు, ఓడిపోయినప్పుడు మాత్రం సోషల్ మీడియాలో విమర్శలు గుప్పించడంలో ముందుంటారని సాత్విక్ ఆరోపించారు. వ్యక్తిగత విషయాలను కూడా లాగుతూ ట్రోల్ చేస్తున్నారని, అందుకే తాను ఇప్పటికే ‘X’ (ట్విట్టర్) నుండి తప్పుకున్నానని, త్వరలో ఇన్‌స్టాగ్రామ్‌ను కూడా వదిలేస్తానని స్పష్టం చేశారు. చిరాగ్ శెట్టి కూడా ఇదే ఆవేదనను వ్యక్తం చేస్తూ.. పనికిమాలిన వీడియోలు చేసే వారికి ఉన్న గుర్తింపు దేశం కోసం ఆడేవారికి లేకపోవడం దురదృష్టకరమని పేర్కొన్నారు. ఈ స్టార్ షట్లర్ల వ్యాఖ్యలు భారతదేశంలో క్రీడా సంస్కృతి మారాల్సిన అవసరాన్ని మరోసారి గుర్తు చేస్తున్నాయి.