పిల్లలకు ఫోన్ ఇస్తున్నారా? అయితే వారిని ప్రమాదంలో పడినట్లే !!

ప్రస్తుత ఉరుకుల పరుగుల జీవితంలో పిల్లలను సముదాయించడానికి లేదా వారికి అన్నం తినిపించడానికి స్మార్ట్‌ఫోన్ ఒక సులభమైన మార్గంగా మారిపోయింది. అయితే, ఈ అలవాటు పిల్లల బంగారు భవిష్యత్తును ఎంతలా దెబ్బతీస్తుందో తెలుసుకొండి.

పిల్లలకు ఫోన్ ఇవ్వడం అనేది కేవలం ఒక అలవాటు మాత్రమే కాదు, అది వారి మెదడు నిర్మాణాన్ని మార్చేసే ప్రమాదకరమైన ప్రక్రియ అని శాస్త్రవేత్తలు హెచ్చరిస్తున్నారు. ముఖ్యంగా 3 నుంచి 5 ఏళ్ల మధ్య వయస్సు ఉన్న చిన్నారులపై నిర్వహించిన ఎంఆర్ఐ (MRI) స్కాన్లలో విస్తుపోయే నిజాలు బయటపడ్డాయి. రోజుకు కేవలం రెండు గంటల పాటు మొబైల్ స్క్రీన్ చూసిన పిల్లల్లో మెదడులోని ‘వైట్ మ్యాటర్’ (White Matter) పరిమాణం తగ్గుతున్నట్లు గుర్తించారు. మెదడులోని వివిధ భాగాల మధ్య సమాచార మార్పిడికి ఈ వైట్ మ్యాటర్ చాలా ముఖ్యం. ఇది తగ్గడం వల్ల పిల్లల మేధో వికాసం కుంటుపడి, వారి మెదడు ఎదుగుదల మందగిస్తుంది.

మాటలు రావడం ఆలస్యం.. నేర్చుకోవడంలో ఇబ్బందులు

స్మార్ట్‌ఫోన్లకు అలవాటు పడటం వల్ల పిల్లల్లో సహజంగా ఉండాల్సిన గ్రాహక శక్తి దెబ్బతింటుంది. వైట్ మ్యాటర్ తక్కువగా ఉన్న పిల్లల్లో భాషా నైపుణ్యాలు సరిగా అభివృద్ధి చెందవని, దీనివల్ల వారికి మాటలు రావడం ఆలస్యమవుతుందని పరిశోధనలో తేలింది. అంతేకాకుండా, కొత్త విషయాలను అర్థం చేసుకోవడం, చదవడం మరియు సమస్యలను పరిష్కరించే సామర్థ్యం (Cognitive Skills) గణనీయంగా తగ్గుతాయి. ఫోన్ స్క్రీన్ నుంచి వచ్చే వేగవంతమైన దృశ్యాలు మరియు శబ్దాలకు అలవాటు పడిన మెదడు, పుస్తకాలు చదవడం లేదా క్లాసులో పాఠాలు వినడం వంటి ఏకాగ్రతతో కూడిన పనులపై దృష్టి పెట్టలేకపోతుంది.

తల్లిదండ్రులు తీసుకోవాల్సిన జాగ్రత్తలు

పిల్లల మెదడు చురుగ్గా, ఆరోగ్యంగా ఉండాలంటే వారిని డిజిటల్ స్క్రీన్లకు సాధ్యమైనంత దూరంగా ఉంచడమే ఏకైక మార్గం. ఆహారం తినిపించేటప్పుడు ఫోన్ చూపించే బదులు వారితో మాట్లాడటం, కథలు చెప్పడం వంటివి అలవాటు చేయాలి. పిల్లల్లో సృజనాత్మకత పెరగాలంటే వారికి బొమ్మలు గీయడం, శారీరక శ్రమతో కూడిన ఆటలు మరియు తోటి పిల్లలతో కలిసి ఆడుకునేలా ప్రోత్సహించాలి. టెక్నాలజీ అనేది సమాచారానికి అవసరమే కానీ, అది చిన్నారుల సహజ ఎదుగుదలకు ఆటంకం కాకూడదు. నేటి నుంచి మీ పిల్లల చేతిలో ఫోన్ పెట్టే ముందు, అది వారి మెదడుపై చూపే ప్రభావాన్ని ఒక్కసారి ఆలోచించండి.