Ponguleti Srinivasa Reddy : తెలంగాణలో నిషేధిత భూముల (22A) అంశంపై ప్రతిపక్ష బీఆర్‌ఎస్ పార్టీ అనవసర రాజకీయాలు చేస్తూ ప్రజలను అయోమయానికి గురిచేస్తోందని రాష్ట్ర ముఖ్యమంత్రి రేవంత్ రెడ్డి తీవ్ర స్థాయిలో విరుచుకుపడ్డారు.
22A భూముల సమస్యను ఒక పెద్ద భూతంగా చిత్రీకరిస్తూ బీఆర్‌ఎస్ నేతలు అబద్ధపు ప్రచారాలకు ఒడిగడుతున్నారని ఆయన మండిపడ్డారు. రెవెన్యూ శాఖ మంత్రి పొంగులేటి శ్రీనివాస రెడ్డి ఎంతో ముక్కుసూటి మనిషి అని, నిజాయితీగా నిర్ణయాలు తీసుకుంటారని కొనియాడిన సీఎం, ఆయన తత్వాన్ని తట్టుకోలేకే కొందరు కావాలని తప్పుడు ఆరోపణలు చేస్తున్నారని స్పష్టం చేశారు. పారదర్శకమైన పాలన అందిస్తుంటే ఓర్వలేకనే ఈ రకమైన అసత్య ప్రచారాలకు తెగబడుతున్నారని రేవంత్ రెడ్డి ఫైర్ అయ్యారు.
22A భూముల వెనుక అసలు నిజాలు: చర్చకు వస్తే బీఆర్‌ఎస్ అక్రమాలు బయటపడతాయి!
గత బీఆర్‌ఎస్ ప్రభుత్వ హయాంలో 22A నిషేధిత భూముల జాబితా పేరుతో భారీగా అవకతవకలు, అక్రమాలు జరిగాయని సీఎం రేవంత్ రెడ్డి ఆరోపించారు. శాసనసభలో లేదా బహిరంగంగా 22A పై నిజమైన చర్చ జరిగితే తమ పాత పాపాలు, భూ ఆక్రమణలు ఎక్కడ బయటపడతాయోననే భయంతోనే బీఆర్‌ఎస్ నాయకులు అంశాన్ని పక్కదారి పట్టిస్తున్నారని విమర్శించారు. ప్రభుత్వం తీసుకుంటున్న ప్రజానుకూల నిర్ణయాలను అడ్డుకోవడమే ధ్యేయంగా ప్రతిపక్షం వ్యవహరిస్తోందని, ప్రజలు ఈ అబద్ధపు ప్రచారాలను నమ్మవద్దని ఆయన పిలుపునిచ్చారు. 22A భూముల సమస్యకు శాశ్వత పరిష్కారం చూపి బాధితులకు న్యాయం చేయడమే తమ ప్రభుత్వ ప్రధాన లక్ష్యమని తేల్చి చెప్పారు.