'ప్రజా పాలన.. ప్రగతి ప్రణాళిక' కార్యక్రమం పూర్తి

Praja Palana-Pragati Pranalika : తెలంగాణ రాష్ట్ర ప్రభుత్వం ప్రతిష్టాత్మకంగా చేపట్టిన 99 రోజుల 'ప్రజా పాలన.. ప్రగతి ప్రణాళిక' కార్యక్రమం విజయవంతంగా ముగిసింది.

మార్చి 6వ తేదీన ప్రారంభమైన ఈ సుదీర్ఘ కార్యాచరణ, ఈ నెల 12వ తేదీ వరకు నిరంతరాయంగా సాగింది. ఈ కార్యక్రమం ముఖ్య ఉద్దేశం ప్రజలకు ప్రభుత్వ సేవలను మరింత వేగంగా, పారదర్శకంగా చేర్చడమే. ఇందులో భాగంగానే, వివిధ ప్రభుత్వ శాఖల్లో సుదీర్ఘకాలంగా మూలనపడి ఉన్న 1,06,598 పెండింగ్ ఫైళ్లను అధికారులు ప్రత్యేక శ్రద్ధతో పరిష్కరించారు. దీనివల్ల ఎంతోమంది పౌరులకు ఏళ్ల తరబడి వేధిస్తున్న సమస్యల నుంచి ఉపశమనం లభించింది. ప్రభుత్వ యంత్రాంగంలో జవాబుదారీతనాన్ని పెంచుతూ, ప్రజల చెంతకే పాలనను తీసుకెళ్లడంలో ఈ ప్రణాళిక ఒక మైలురాయిగా నిలిచింది.

గ్రామీణ వికాసం - ప్రజా భాగస్వామ్యం

ఈ 99 రోజుల ప్రణాళికలో కేవలం ఫైళ్ల పరిష్కారమే కాకుండా, గ్రామీణ మౌలిక వసతుల కల్పనకు, మహిళా సాధికారతకు పెద్దపీట వేశారు. రాష్ట్రవ్యాప్తంగా 7,292 గ్రామాల్లో 'స్త్రీ శక్తి భవనాలు', వ్యవసాయ రంగానికి ఊతమిచ్చేలా 131 గోదాములు, అలాగే స్థానిక ఉపాధిని పెంపొందించడానికి 577 వర్క్ షెడ్ల నిర్మాణాలకు ఈ కాలంలోనే శంకుస్థాపనలు జరిగాయి. ప్రజాస్వామ్య వికేంద్రీకరణను బలోపేతం చేస్తూ 12,758 గ్రామ పంచాయతీల్లో గ్రామసభలు, 3,175 మున్సిపల్ వార్డుల్లో వార్డు సభలను నిర్వహించారు. ఈ సభల ద్వారా ప్రజల నుంచి నేరుగా సమస్యలను తెలుసుకుని, స్థానిక అవసరాలకు అనుగుణంగా ప్రణాళికలు రూపొందించారు. మొత్తంగా 15,76,219 దరఖాస్తులను స్వీకరించి, వాటి పరిష్కారానికి ప్రభుత్వం ముందడుగు వేయడం విశేషం.