Balapur Murder Case: హైదరాబాద్ నగరం బాలాపూర్ పోలీస్ స్టేషన్ పరిధిలో తీవ్ర కలకలం రేపిన దారుణ ఘటన వెలుగుచూసింది. 21 ఏళ్ల బీహార్ యువతి రహీన దారుణంగా హత్యకు గురైంది.
ఆమెను ప్రేమించిన మహమ్మద్ సలామ్ అనే యువకుడే ఈ దారుణానికి ఒడిగట్టినట్లు పోలీసులు అనుమానిస్తున్నారు.
ఫంక్షన్ హాల్లో చిగురించిన పరిచయం.. హత్యకు దారితీసిన అనుమానం
పోలీసుల ప్రాథమిక విచారణ ప్రకారం.. బీహార్కు చెందిన రహీన పహాడీషరీఫ్లోని బిస్మిల్లా కాలనీలో నివాసముంటోంది. స్థానిక ఫంక్షన్ హాల్లో పని చేస్తున్న క్రమంలో సహోద్యోగి అయిన మహమ్మద్ సలామ్తో పరిచయం ఏర్పడి ప్రేమగా మారింది. అయితే, రహీన తనను పెళ్లి చేసుకోవాలని ఒత్తిడి చేయడం, అలాగే మరో యువకుడితో సన్నిహితంగా ఉంటోందనే అనుమానంతో వీరిద్దరి మధ్య తీవ్ర విభేదాలు తలెత్తాయి.
వాగ్వాదం, కత్తితో దాడి.. మృతదేహం తరలింపునకు యత్నం
రాత్రి వేళ ఇద్దరి మధ్య మొదలైన గొడవ తీవ్రస్థాయికి చేరడంతో సలామ్ కత్తితో పొడిచి రహీనను హతమార్చాడు. అనంతరం మృతదేహాన్ని ఒక గోనె సంచిలో కుక్కి అక్కడి నుంచి తరలించేందుకు ప్రయత్నించాడు. గమనించిన స్థానికులు వెంటనే పోలీసులకు సమాచారం అందించడంతో ఈ దారుణం బయటపడింది. పోలీసులు ఘటనా స్థలానికి చేరుకుని మృతదేహాన్ని స్వాధీనం చేసుకుని, పోస్టుమార్టం నిమిత్తం ఉస్మానియా ఆసుపత్రి మార్చురీకి తరలించారు.
Balapur Murder Case: పరారీలో నిందితుడు: సీసీటీవీల ఆధారంగా దర్యాప్తు
ఈ హత్యలో సలామ్తో పాటు మరికొందరి హస్తం ఏమైనా ఉందా అనే కోణంలో కూడా బాలాపూర్ పోలీసులు దర్యాప్తు చేస్తున్నారు. సీసీటీవీ ఫుటేజ్, మొబైల్ డేటాను పరిశీలిస్తూ పరారీలో ఉన్న నిందితుడి కోసం గాలింపు చర్యలు ముమ్మరం చేశారు.