సాధారణంగా తమిళనాడు రాజకీయ నాయకులు అంటే తెల్లటి పంచె, చొక్కా లేదా ఖద్దరు దుస్తుల్లో కనిపిస్తుంటారు. కానీ, ప్రమాణ స్వీకార వేడుకలో విజయ్ చాలా ప్రొఫెషనల్‌గా కనిపించారు.

తెల్లటి షర్ట్, నల్లటి ఫార్మల్ ప్యాంట్ ధరించి ఒక కార్పొరేట్ సీఈఓ తరహాలో వేదికపైకి రావడం అందరి దృష్టిని ఆకర్షించింది. గ్లామర్ ప్రపంచం నుంచి వచ్చినప్పటికీ, ఆడంబరాలు లేకుండా చాలా సింపుల్‌గా, హుందాగా కనిపించడం ఆయన కార్యదక్షతకు మరియు మారుతున్న రాజకీయ ఆలోచనా విధానానికి సంకేతమని విశ్లేషకులు భావిస్తున్నారు. ఈ ‘ప్రొఫెషనల్ సీఎం’ లుక్ ఇప్పుడు సోషల్ మీడియాలో విపరీతంగా వైరల్ అవుతోంది.

Read Also : విజయ్ ప్రమాణ స్వీకారం: నెహ్రూ స్టేడియానికి చేరుకున్న రాహుల్ గాంధీ

ఒకే ఒక్కడు అర్జున్‌తో పోలిక: నెటిజన్ల ప్రశంసలు

విజయ్ ఫార్మల్ డ్రెస్సులో కనిపిస్తుంటే.. శంకర్ దర్శకత్వంలో వచ్చిన ‘ఒకే ఒక్కడు’ (ముదల్వన్) సినిమాలో ముఖ్యమంత్రిగా నటించిన అర్జున్ గుర్తుకు వస్తున్నారని నెటిజన్లు కామెంట్స్ చేస్తున్నారు. ఆ సినిమాలో అర్జున్ ఎలాగైతే ఒక ఆధునిక, చురుకైన యువ ముఖ్యమంత్రిగా కనిపిస్తారో, విజయ్ కూడా అదే తరహాలో కనిపిస్తున్నారని అభిమానులు సంబరపడుతున్నారు. “కేవలం దుస్తుల్లోనే కాదు, పాలనలో కూడా ఒకే ఒక్కడు లెవల్లో మార్పులు తీసుకురావాలి” అంటూ సామాన్యులు సోషల్ మీడియా వేదికగా ఆకాంక్షిస్తున్నారు. ఖద్దరు నాయకుల మధ్య ఈ ‘జేమ్స్ బాండ్’ స్టైల్ ముఖ్యమంత్రి ఒక విప్లవాత్మక మార్పుగా కనిపిస్తున్నారు.

ద్రవిడ సంప్రదాయానికి భిన్నంగా.. కొత్త తరం నాయకత్వం

గత 60 ఏళ్లుగా తమిళనాడును ఏలిన ద్రవిడ పార్టీల నేతలందరూ ఒకే రకమైన వస్త్రధారణను అనుసరిస్తూ వచ్చారు. అయితే విజయ్ ఆ సంప్రదాయాన్ని పక్కన పెట్టి తనకంటూ ఒక ప్రత్యేక శైలిని ఏర్పరచుకున్నారు. ఇది కేవలం ఫ్యాషన్ మాత్రమే కాదని, పాతకాలపు రాజకీయాలకు, ప్రస్తుత తరానికి మధ్య ఉన్న వ్యత్యాసాన్ని చూపిస్తోందని రాజకీయ పండితులు విశ్లేషిస్తున్నారు. ఈ కొత్త లుక్ యువతను అమితంగా ఆకట్టుకుంటోంది. ముఖ్యమంత్రి అంటే కేవలం వేదికలపై ప్రసంగించే వ్యక్తి మాత్రమే కాదని, క్షేత్రస్థాయిలో పనిచేసే ఒక ప్రొఫెషనల్ అని విజయ్ తన వేషధారణ ద్వారా చెప్పకనే చెప్పినట్లయింది.