AMCA project AP : ఆంధ్రప్రదేశ్‌లోని రాయలసీమ ప్రాంతం అంతర్జాతీయ రక్షణ రంగ పటంలోకి చేరనుంది. పుట్టపర్తి వేదికగా నిర్మించనున్న 'అడ్వాన్స్‌డ్‌ మీడియం కాంబాట్‌ ఎయిర్‌క్రాఫ్ట్‌' (AMCA) ప్రాజెక్టుకు కేంద్ర రక్షణ మంత్రి రాజ్‌నాథ్ సింగ్ మరియు సీఎం చంద్రబాబు నాయుడు శుక్రవారం శంకుస్థాపన చేశారు.

రూ. 15,803 కోట్ల భారీ బడ్జెట్‌తో, సుమారు 650 ఎకరాల్లో ఈ అత్యాధునిక యుద్ధ విమానాల తయారీ కేంద్రాన్ని ఏర్పాటు చేస్తున్నారు.

ఐదో తరం యుద్ధ విమానాల తయారీ కేంద్రం

దేశీయంగా అత్యంత శక్తివంతమైన ‘ఐదో తరం’ (5th Generation) యుద్ధ విమానాలను తయారు చేయడమే ఈ ప్రాజెక్టు ప్రధాన లక్ష్యం. డీఆర్‌డీఓ (DRDO) మరియు ఏరోనాటికల్ డెవలప్‌మెంట్ ఏజెన్సీ (ADA) సంయుక్తంగా ఈ కేంద్రాన్ని నిర్వహిస్తాయి. ఈ ప్రాజెక్టు ద్వారా సుమారు 7,500 మంది నిపుణులకు ప్రత్యక్షంగా ఉపాధి లభించడమే కాకుండా, వేలాది మందికి పరోక్షంగా ఉపాధి అవకాశాలు లభిస్తాయి.

Read Also: Petrol Price Hike: ఎన్నికలు అవ్వగానే పెట్రోల్ బాదుడు.. కేంద్రంపై ఎమ్మెల్యే యెన్నం ఫైర్!

ఏఎమ్‌సీఏ (AMCA) ప్రాజెక్టు ప్రత్యేకతలు

ఈ కేంద్రంలో తయారయ్యే విమానాలు భారత వైమానిక దళానికి వెన్నెముకగా మారనున్నాయి. ఏఎమ్‌సీఏ అనేది రెండు ఇంజన్లు కలిగిన ‘స్టీల్త్’ ఫైటర్ జెట్. అంటే ఇది శత్రువుల రాడార్లకు చిక్కకుండా గగనతలంలో దూసుకెళ్లగలదు. అత్యాధునిక ఏవియానిక్స్, స్మార్ట్ ఆయుధ సంపత్తి మరియు క్షిపణులను దారి మళ్లించే వ్యవస్థలు ఇందులో ఉంటాయి. ఈ ప్రాజెక్టు విజయవంతమైతే, అమెరికా, రష్యా, చైనా సరసన భారత్ కూడా ఐదో తరం యుద్ధ విమానాలను కలిగిన అతికొద్ది దేశాల జాబితాలో చేరుతుంది.